Program Nyungkak Ekonomi Ruang Bilik meri pemaik ngagai orang indu di Bakong
BELURU: Lebih 50 iku orang indu ari tiga buah rumah panjai di Bakong udah bulih penguntung ari Program Nyungkak Ekonomi Ruang Bilik Perintah ti diatur ujung minggu nyin tadi, ti ngembuan juluk ngangkatka penatai pemisi ruang bilik nengah industri kotej.
Pesereta tu nerima latih ari jurulatih ba pekara kosmetik,krafjari sereta ngaga mi enggau kerupok lekor.
Pengerami nya udah dipenyadika SAO Albania Linus Lukong ba Rumah Engkas anak Entari di Sungai Mallang Sanin, ke alai program nya udah dipasuk 25 iku pesereta ari rumah panjai nya ti dipejalaika enam iku jurulatih kena Hari Enam nyin tadi.
Program latih ke sebaka mega deka diatur ba Rumah Collin Sait enggau Rumah Christopher di Bakong.
Tu tampung program pe- mansang orang indu ti dipenyadika Menteri Pemansang Pengintu pengelantang Orang Indu enggau Ruang Bilik, Datuk Fatimah Abdullah di Marudi bulan siti nyin tadi ba Dewan Suarah Baram, ti digulu 663 iku orang indu ari sitak Marudi.
Iya udah minta Hari Orang Indu Renggat Pelilih Menua diintu belabuh ari 1 September nyentuk 16 Oktober ngambika orang indu di menua pesisir sama bela ulih masuk ba aktiviti nya. Hari Orang Indu Renggat Antarabansa diintu kena 8 Mac ninting taun. Menua Malaysia ngintu pengerami nya ba renggat National kena 24 September lalu Sarawak ngintu pengerami nya kena 17 Oktober.
Rambai jaku pengerami nya taun tu, ‘Make it happen’ ti nyadika pesan ngagai orang indu ngambika diberi awak ke ebaka ba pelajar enggau karier.