Pekit Ngajat enggau Makai Begempuru SADIA diatur kena 9 Oktober 2015
KUCHING: Sarawak Dayak Iban Association (SADIA) pampang Kuching ngembuan juluk ngemanahka kaul ba kaban gerempung nya nengah pengerami betemu baru enggau kaban lama sereta gempuru makai lemai.
Siti ari pelasar dikena nyapai juluk tu iya nya nengah Pekit Ngajat Sadia Kuching 2015 ke mega makai lemai begempuru ti deka berengkah pukul 7 lemai kena 9 Oktober.
Pengerami ti deka diatur ba Palan Ekumenikal Kristian ba Jalai Stampin, Sadia Kuching madahka juluk sida endang deka ngenegapka pemereti ati ba raban gerempung ngambika nyadi baka sebuah ruang bilik enda ngira jalai pengarap enggau status sosial.
“Ngembuan pemereti ati ba raban gerempung, kami ngarapka udah ulih nempa pengandal ati ti manah agi ngagai pangan diri ngambika mujur gawa besaup. Juluk tu setipak enggau pengingin perintah ke diatu ,”ku Chair- man pampang nya, Datuk Paduka Anthony Nait Mani nengah penerang berita kemari.
Legit pengerami malam nya, iya pekit Ajat Iban ti dibuka ngagai lelaki enggau indu ke beumur 18 ke atas. Pemenang deka neri perais mata duit, tropi, setipikit enggau hamper. Champion ari tetiap kategori deka mai pulai perais mata duit RM500, lumur dua RM300 enggau lumur tiga nerima RM200. Perais sagu ari RM50 mega deka diberi ngagai tetiap iki pesereta.
Taja pia, pemekit enda tau enda bansa Iban lalu sesapa ti kala nyadi champion sebedau tu enda diterima masuk laban ngawakka bala bukai ti baru nelebaka diri ngajat, ku Nait.
Menteri Pemansang Rama, Tan Sri William Mawan deka nyadi temuai ti dipebasaka malam nya.
Klimpah ari nya, bala ti datai malam nya mega deka diperindang gerup Soldadu Malaysia,ku iya.
Maya tutup ngerejista diri masuk pekit ngajat kena 30 september, pukul 4 lemai.
Penerang ke silik tau ditanya ngagai Nait nengah lumur 017-8075196. Kelimpah ari nya, tau mega ditanya ngagai Lamina Jintang (0198168120); Phillip Sampurai (017-8089815); Ricky Tujoh (013-5744319) enggau Enggong Aji (019-8317060).