Ungkup belanja dikena ngaga Jematan Igan dikemendarka
SIBU: Kaban Kunsil Nengeri (ADUN) Jemoreng, Abu Seman Jahwie andal amat laban DUN iya bulih agih belanja ba Langgur Pemansang Malaysia Lumpar Ke-11 (RMK-11) dikena ngaga Jematan Igan.
Ku iya, rayat menua Matu udah lama amat ngining menua sida ulih datai jalai ke disambung ari pelilih Mukah.
“Enti bisi jematan, aku pechaya tikas penatai pemisi rayat ditu ulih disungkakka agi.
“Kebuah pia laban jematan tu ila deka ngemuntangka rayat ditu bejual ngelawa menua bukai baka Mukah kelimpah nyemakka agi menua Matu enggau menua bukai,” pia ku iya maya berandau enggau pengarang berita, kemari.
Ku Abu Seman, naka ke diatu mensia mayuh ke deka ngelawa Mukah tauka Matu begintir nganti penatai feri ari seberai.
“Feri tu semina bejalai naka pukul 10 malam lalu tu meri penanggul ngagai mensia mayuh ti deka ngelayang ngelui ari jam nya,” ku iya nerang.
Berindik ari pekara nya, iya minta perintah berundingka juluk ati sida semenua ti udah lama nganti penumbuh Jematan Igan.