Bario deka ngerembai maju pengudah nyadi Sub- Pelilih Mit
MIRI: Kena 30 Julai taun tu nyadi sejarah ke rayat di Bario lebuh Kepala Menteri Datuk Patinggi Tan Sri Adenan Satem ngenetapka Bario nyadi Sub- Pelilih Mit.
Nya mega ngelaika pemujur Perintah Nengeri ngemansangka menua pesisir sereta ngenyemakka diri enggau komuniti di menua pesisir.
Diatu Bario udah nya SubPelilih Mit, ke alai Majlis Daerah Marudi (MDC) nyerahka iya ngambika ari baruh kuasa Majlis Bandaraya Miri (MCC) berengkah 1 Ogos tu tadi.
Pengawa ngaga Bario nyadi Sub-Pelilih Mit endang dikena nentuka Perintah Nengeri ulih merambu, ngaga sereta ngemataka semua projek enggau program ke pemansang menua pesisir ngambika ngasi agi, sereta nyungkak tikas pengidup peranak ti diau di menua pesisir.
Berebak enggau nya, kemari udah diatur pangawa nyain sempekat entara Majlis Daerah Marudi enggau Majlis Bandaraya ti ditangkan enggau pengawa nyerahka Bario Sub Pelilih Mit Bario ngagai Majlis Bandaraya Miri.
“Kami berasai temegah mangku tanggungpengawa ti mega deka dikemeratka kami dudi ila.
“Nengah basa enggau pengarap ti udah diberi Perintah Nengeri ngagai MCC ngambi nyendiaka servis ke manah agi ngagai Sub Pelilih Mit Bario, kami nguji enggau naka ulih nyaup rayat di Bario,” pia ku Datuk Bandaraya Miri, Lawrence Lai bejaku ba pengelalu iya beserimbai enggau pengawa nya.
MCC deka ngulihka ungkup belanja ari Perintah Besai dikena ngaga / ngemanah jalai ke semua genturung pendiau di Bario, ngambika nyamai ditengah peranak menua ke besemak sereta mega nurun ke bandaraya Miri.
Sama bisi ngulu atur pengawa nya Sekreteri Mendam ba Opis Kandang Menua enggau Pemansang Komuniti Sarawak, Datu Dr Penguang Manggil ; Sapir Datuk Bandaraya Miri, Mohd Chee Kadir enggau Sekreteri Opis Pelilih Marudi, Petrick Linggie Taboh enggau bala bukai.
Enda tinggal mega bala Kaunsilor ari Miri enggau Marudi sama bela bisi datai ngemataka atur pengawa ti besejarah nya.