Malin temuai enda ditatak endur mai temuai raun enti bisi kad RSTG
SIBU: Lebih 100 iku malin temuai ke belisin ba nengeri tu udah tu ila enda ditatak mai bala temuai bejalai ke serata nengeri enti udah bisi kad ‘Regional Specific Tourist Guide’ (RSTG).
Chairman Gerempung Malin Temuai Sarawak (STGA) Abang Azahari Abang Zaidan madah, lisin tauka kad ke belinsu emas nya deka nganti lisin belinsu biru enggau gadung ke dipansut Opis Menteri Dagang Temuai enggau Main Asal (KPK).
SGTA ke diatu bisi 160 iku raban lalu urung 100 iku ari sida nya deka bulih kad belinsu emas enda lama agi enti sida pas ba peresa RGST.
“Sebedau bulih kad nya sida meseti ngulu kus ke diatur RSTG ti dipejalaika Kolej SATT ke dipadu KPK.
“Enti bulih kad tu ila, bala malin temuai dikemendar mai bala temuai raun serata nengeri Sarawak enda nyengkaum Taman Negara,” pia ku iya madah ngagai pengarang berita sepengudah meri licha senentang kus RSTG nya ngagai malin temuai ba sitak tengah ditu di Sibu, lemai kemari.
Ku iya, penemu deka ngaga lisin tu bepun ari penemu ke dibantai Gerempung Malin Temuai Sabah enggau STGA ngagai KPK.
“Sebedau tu kitai semina bisi lisin belinsu biru enggau gadung ti semina ngemendarka malin temuai mai bala temuai raun sebelah mengeri enggau bejalai meda rampa menua aja.
“Lisin tu mega enda nge- mendarka malin temuai bejalai ngagai menua bukai kelimpah menua diri empu.
“Ambika banding, enti malin temuai nya gawa di Kuching, iya enda ulih gawa ngagai mengeri bukai kelimpah ari di Kuching aja,” ku iya madahka baru.
Nerang kus ke diatur RSTG, ku Abang Azahari, sida ke ngambi bagi meseti enggau kus ba pengelama 500 jam tauka enam bulan.
Bayar masuk kus tu iya nya RM7,500, tang sida ke bisi ati mega tau minta jali ari Tabung Pembangunan Kemahiran.
Kus tu udah diatur di Sibu sereta dipejalaika Bob Zakaria ari Kolej SATT, ti mega Sapit Chairman STGA.