Peranak ba kandang menua Matang, Sampadi nyentuk Rambungan suntuk ai

KUCHING: Sekeda peranak ba kandang menua Matang, nyengkaum Sampadi nyentuk ke Rambungan di Lundu betapi enggau penanggul bekal ai ti nadai ditimpuh ketegal kesuh ai ti enda deras ba Loji Meresi Ai, Matang.

Ketuai Opis Pengerara Api enggau Penyah Penusah ( Bomba) Malaysia ( JBPM) Nengeri Zon Kuching, Tiong Ling Hii madahka penanggul bekal ai nya nyadi ketegal nadai ujan ti ngujungka loji nya nyau deka langkang.

Ku iya, kandang menua Sampadi enggau Rambungan mega bepanggai ba Loji Meresi Ai Matang lalu guna ai ba kandang menua Matang mayuh amat nyentukka ngachau peneras ai ba dua kandang menua nya.

“Kami ( JBPM) enggau Opis Kereja Raya ( JKR) Nengeri udah nganjung bekal ai beresi ngagai peranak ba dua kandang menua nya, laban kesuh peneras ai ti enda balat.

“Ke penerang, aktiviti nyendiaka bekal ai beresi ba kededua kandang menua nya deka dilanjar nyentukka Loji Meresi Ai Matang pulai baru baka selama,” ku iya madah ngagai Utusan Borneo nengah aplikasyen ‘Whatsapp’ kemari.

Ku iya, aktiviti nyendiaka bekal ai beresi nya berengkah kenyau Hari Dua (Selasa) tu tadi ngena sebuah kerita bomba iya nya ‘Fire Rescue Tender’ (FRT) enggau sebuah tangki ai ari Lembaga Air Kuching (LAK) kelimpah dikemataka penyelia ari Balai Bomba Lundu.

Entara kandang menua bukai ti sama betapi enggau penanggul bekal ai nyangkaum peranak ba Kg Matang Batu 10, Palan Jelu Siga Matang, Kubah Family Park, Politeknik Kuching, SMKA Matang, Kg Jaya Bakti, Kg Kandung, Kg Rayu, sepemanjai Jalai Telaga Air, Kg Temenggong, Kg Temedak, Kg Selang Hulu, Kg Selang Hilir, Kg Selang Laut, JAKIM, IKMAS enggau Kg Telaga Air.

Kelimpah ari nya lebuh ti ngenang pasal pekara bukai , Direktor JBPM Nengeri Nor Hisham Mohammad lebuh ditelefon madahka sepemanjai bulan September, nadai ngerikodka penusah angus besai di serata nengeri Sarawak.

Ku iya, ripot ti diterima JBPM bekaul enggau penusah angus, semina beberapa kali aja tambah mega penusah angus mit nya nyadi ba tanah puang tauka babas.

“Hari Dua tu tadi kami nerima dua iti ripot pasal penusah angus sereta ngerara api ba tanah puang tauka babas iya nya di Sibu enggau Kota Samarahan.

“Sebedau tu ba bulan (September), bisi seiti penusah angus besai ti nyadi di Marudi, tang udah padam magang kena 24 September tu tadi lalu penusah angus nya nyadi ba tanah ladang baru.

“Lalu ba bulan September aja, kami bisi nerima 73 iti ripot pasal penusah angus mit ti nyadi di serata nengeri tu ke mungkur pemesai 37 hektar,” ku iya