‘Kimia’ beguna ba pengidup kitai ninting hari
Kitai patut nemu kimia ti bekaul enggau pengidup kitai ninting hari baka ba pemakai, pelajar enggau ke bukai
KOTA SAMARAHAN: Penemu nembiak rebak baru diatu sereta komuniti pasal pelajar Kimia beguna amat laban pemesai guna kimia bisi bekaul enggau pengidup kitai ninting hari.
Sapit Kepala Menteri Datuk Patinggi Tan Sri Alfred Jabu madah, Kimia entara barang ke bisi bekaul ba pengidup kitai ninting hari baka dalam pemakai, ubat, pengawa betanam betupi enggau industri ngaga barang.
“Barang ti ngundan kimia ke dikena kitai ninting hari deka nambah nitihka pemansang dunya kemaya hari tu lalu mensia mega seruran begunaka barang baru. Enggau nya, pengawa sereta saup raban Kimia ngagai pemansang menua besai amat reti,” ku Jabu.
Iya madah munyi nya lebuh bejadika ‘ Karnival Kimia Malaysia 2015 (K2M)’ Zon Sarawak di DeTAR, UNIMAS ti diatur ulih Institut Kimia Malaysia (IKM) enggau UNIMAS ti digulu urung 300 iku nembiak sekula ari Pelilih Mit Padawan sereta bala nembiak ari UNIMAS empu.
Raban Kimia ku iya, udah mayuh nyaup menua mutarka sekeda pekara baka nasat pengawa salah, kes toksikologi (dadah sereta pekara bukai) enggau kes serologi (sampel darah enggau pekara bukai).
“Raban Kimia mega bejalaika pansik kualiti ai, angin, sereta mantu ngaga analisis kimia dalam ( utai ke kamah) sereta minyak ke siuh. Pansik pemakai baka melamin dalam tusu, rachun indu utai ba sayur, nutrien tanah, kes telu tiru enggau kes ‘halal haram’ mega dipejalaika raban Kimia,” ku iya seraya madahka pengawa UNIMAS ke ngatur Karnival Kimia nya beguna amat laban ulih ngiri penemu ngagai mensia may- uh sentang barang ke bekaul enggau Kimia sereta mega pemansang pelajar dunya, nyaga rampa menua enggau pemansang ekonomi.
Jabu ti mega Menteri Pemansang Menua Pesisir madah, setipak enggau rambai jaku Karnival Kimia, ‘Chemistry for a sustainable world’, karnival nya dikearapka ulih meransang mensia mayuh enggau bala nembiak ngambika dalam agi pengerindu belajarka subjek tu Kimia jemah ila.
Kelimpah ari nya, iya madahka karnival ti diatur Institut Kimia Malaysia mega respon ngagai perintah ti deka ngemeranka Sains enggau Matematik ba rayat Malaysia ngambika ulih nempa pengaya, penemu enggau pengelantang pendiau rayat.
“Dalam era ekonomi bepalasarka penemu sereta inovasyen, pengelandik dalam Sains enggau Matematik nyadi kunchi ngagai pemansang menua. Enggau nya, modal mensia dalam Sains enggau Matematik, nyengkaum Kimia patut dikemansangka.
“Nya mega nyadi puku ngangkatka pengelandik teknikal ti beguna amat ke dalam pemansang menua ti deka nyapai juluk ngembuan ekonomi ke bepemisi besai,” ku iya.
Sebedau nya, Mandal Canselor UNIMAS Prof Dato Dr Mohamad Kadim Suaidi madahka penemu sereta minat dalam Kimia patut dipatih ba bala nembiak ari umur sida iya agi biak.
Bala nembiak sekula ke deka nemu enggau silik agi sereta bisi pengerindu dalam Sains kelebih agi Kimia, tau nyadi platfom ke manah ngambika sida ulih nyadi orang ke landik dalam Kimia jemah ila.
“Enti pengerindu tu di-
“
Barang ti ngundan kimia ke dikena kitai ninting hari deka nambah nitihka pemansang dunya kemaya hari tu lalu mensia mega seruran begunaka barang baru. Enggau nya, pengawa sereta saup raban Kimia ngagai pemansang menua
” besai amat reti. Datuk Patinggi Tan Sri Alfred Jabu Sapit Kepala Menteri Sarawak
patih ba nembiak kenyau sida agi biak, Sida deka muntang agi nampung pelajar Sains ngagai renggat universiti jemah ila. Tu mega setipak enggau pengingin perintah ti deka ngemayuhka agi raban sains enggau teknologi dikena ngemujurka juluk menua,” ku iya.
Sama bisi ngulu atur pengawa tu kemari, Dekan, Fakulti Sains enggau Teknologi Sumber, UNIMAS Prof Madya Dr. Othman Bojo, Pemesai Opis Pelajar Pelilih Mit Padawan, Salina Bujang enggau Chairman IKM Pampang Sarawak, Dr Alvin Chai Lian Kuet.