K2M palan pengiri penemu pasal kimia ngagai nembiak enggau mensia mayuh

KOTA SAMARAHAN: Karnival Kimia Malaysia ( K2M) ti keterubah endar diatur dalam taun 2011 sereta dipenyadika Menteri Sains, Teknologi enggau Inovasi Malaysia, diatur beserimbai enggau ‘ International Year of Chemistry’ ti nyadi inovasyen, meri penemu ngagai mensia mayuh sereta meransang bala nembiak rindu belajarka pasal Kimia.

Bedau lama tu tadi, Institut Kimia Malaysia (IKM) begulai enggau Universiti Malaysia Sarawak (UNIMAS) sereta Opis Pelajar Pelilih Mit Padawan (PPD) udah ngatur K2M, Zon Sarawak di DeTAR, UNIMAS.

Program nya diatur ungkup sekula sekondari ke ari baruh pegai PPD Padawan enggau Samarahan, ke alai urung 240 iku nembiak sekula sekondari enggau urung 120 nembiak UNIMAS udah sama dibai ngagai karnival nya ti dipenyadika Sapit Kepala Menteri ti mega Menteri Pemansang Menua Pesisir, Datuk Patinggi Tan Sri Alfred Jabu.

Chairman IKM Sarawak, Dr. Alvin Chai Lian Kuet madah, taun tu IKM Sarawak ngatur K2M Zon Sarawak begulai enggau UNIMAS enggau PPD ti berambai leka jaku ‘Chemistry for a Sustainable World’ udah sama setuju mantaika pekara bekaul enggau kimia ke inovatif, landik nengkebang, nadahka pemanah kimia ngagai mensia mayuh, ngangkatka pelajar Kimia di sekula sereta meransang rebak baru ngambi Kimia nyadi batang pengawa sida.

Entara program ke bisi dirintaika ke K2M taun tu, iya nya mandangka video sereta licha ti ari raban Kimia IKM ke gawa di Opis Perintah enggau korporat bekaul enggau DNA Kimia sereta efek CSI; Pemujur sereta Pemansang Inovasyen Kimia, Industri dalam Kimia, Kimia Gadung dalam Inovasyen enggau Pendiau ke Bekualiti sereta Ai.

Kelimpah ari nya, pekit projek sains ‘ Renewable Energy from Biomas’ mega bisi diatur sereta dipasuk enam buah sekula. Pekit projek nya deka diperesa nitihka (novelty, creativity and innovativeness), ( Application of Chemistry Principles) enggau (Potential End Uses), kelimpah ari pengawa pemandang bukai bekaul enggau Kimia.