Dua iku pelatih AB1M dianjung bepekit Djarum Sirkit Nasional Li Ning Tebuka Khatulistiwa 2015

KUCHING: Akademi Badminton 1Malaysia (AB1M) Sarawak bekerejasama enggau Gerempung Badminton Bumiputera Nengeri Sarawak (PBBS) sereta iM Sarawak, deka nganjung dua iku pelatih akedemi nya ngagai Djarum Sirkit Nasional Li Ning Tebuka Khatulistiwa 2015 di Pontianak, Indonesia ti berengkah 28 September nyentuk 3 Oktober 2015.

Kededua pelatih nya deka bepekit dalam ‘ Kategori Pemula’ ke alai kategori tu ungkup nembiak lelaki enggau indu umur ke beumur lima belas taun tauka ada dalam taun 2001,ba bagi ‘single’ tauka ‘doubles’.

Pelatih nya, Abang Syazwan Abang Ishak, 14 ari SMK Semariang enggau Irsyad Iskandar Sukiman, 13 ari SMK St Joseph.

Pelatih ke dipilih masuk pekit nya sebagi ari program dikena meri penemu ti dikemendarka Akademi Badminton, ngambika pelatih ulih nambahka pengelandik seraya ngulihka penemu.

“Akademi tu betuju nyendiaka nembiak baru kelandik bemain badminton di menua tu enggau perengka guna, jurulatih sereta program, ngambika nyulut dalam pengawa lumba enggau main kelimpah ari matih sida nyadi orang ke menyana,” ku Kaban Kunsil Penyanding Penemu iM Sarawak, Irwan Zulkarnain Hasbie.

Iya mega madahka program nya beratika pengeregas enggau penyikar, latih fizikal nyengkaum nempa pemanah ulah.

AB1M ditumbuhka kena bulan Mei 2015 lalu udah ngambi masuk urung 20 iku pelatih.

Presiden PBBS, Tan Sri Abdul Aziz Hussain ngelaluka penumbuh akademi nya, ti dipelaba deka dipenyadi kena bulan Oktober 2015 tu ila.

Naka ke diatu, akademi nya bejalaika program latih sida ba Dewan Badminton PBBS di Jalai Sultan Tengah, Petra Jaya ditu.

Kelimpah ari nya, sebuah gerempung ke nyadi sebagi ari kaban ke sama enggau ngatur program tu, iM Sarawak ngemujurka sebengkah inisiatif pemansang pengawa rama betuaika 1MSAC mantu ngemanahka agi pengelantang pendiau komuniti di serata menua tu, setipak enggau prinsip 1Malaysia, betatika pengelantang pendiau mensia mayuh, pelajar sereta lumba enggau main.