‘Strategic Planning and Delivery Unit’ deka ditumbuh ba tetiap Opis Residen: Mohd Morshidi

SERIAN: S e k r e t a r i Perintah Nengeri Tan Sri Datuk Amar Mohd Morshidi Abdul Ghani netapka sebengkah unit ke dikumbai ‘ Strategic Planning and Delivery Unit’ deka ditumbuh ba tetiap Opis Residen di serata nengeri.

Bejaku ngagai pengarang berita pengudah ngemataka ‘Majlis Penyerahan Tugas Pentadbiran Baru Bahagian Serian’ kemari. Iya madah penumbuh unit nya ngipakka pengeran perintah ti deka ngemansang kandang menua pesisir.

“Tu seiti atur tauka unit ti deka nyaup inisiatif perintah mai pemansang ngagai menua pesisir. Mayuh agi pemansang deka dipejalai lalu tetiap projek enggau program ulih diadu, dikemata enggau nenak agi.

“Tusun pengawa kitai ke dulu sereta mega diatu nadai penimpang tang nengah unit tu kitai ulih fokus ba tetiap perambu enggau projek ke bisi diatur ba tetiap bagi menua,’ku iya.

Dulu agi ari nya ba jaku pengelalu rambau pengerami nya, Morshidi meri puji ngagai Perintah Sarawak kelebih agi ngagai Kepala Menteri ketegal ti udah mujur numbuhka pelilih menua ke-12.

Ku iya, pengawa ngangkat Serian nyadi Pelilih Menua deka nentuka servis ti disediaka perintah ulih diasai rayat Serian enggau mudah sereta engkeman agi.

“Kitai deka meda mayuh begunan perintah ke baru deka digaga jemah, mayuh agi pengawa puang lalu perengka guna mega deka ditambah.

“Pelilih Serian ulih nyadi mengeri besai nyemaka Kuching jemah,”ku iya.

Iya mega ngelalau orang gawa perintah ba opis residen Serian nyendiaka servis ke pemadu manah.

Seraya ngansak orang gawa perintah meseti bisi komitmen, Morshidi minta raban ketuai ngembing nembiak enggau manah ngambi tau nentuka Pelilih Serian mansang.