Perintah dipinta ngaga seiti loji meresi ai ke baru di Lachau
KUCHING: DAP Sri Aman minta perintah nengeri ngaga seiti agi loji meresi ai di Pelilih Sri Aman.
Chairman DAP Sri Aman Leon Jimat Donald madah loji nya manah digaga di Lachau ngambika ulih mekal ai beresi ngagai mayuh rumah panjai ke besemak.
Iya madahka diri udah nerima mayuh sebana sentang penanggul suntuk bekal ai ari peranak di Bukit Begunan, Kara enggau Lachau.
“Aku ngarapka perintah nengeri ulih ngaga loji meresi ai ke baru di Lachau lalu disambung ngagai Pantu sereta paip besai di Sri Aman.
“Bekal ai beresi ke meruan seiti pekara berat ba program pemansang Pelilih Sri Aman. Aku deka ngenataika pekara tu ngagai kaling DAP aku ke mega seiku Kaban Kunsil Nengeri ngambika tau dibantai sereta diperambu ba aum Kunsil Nengeri ti deka datai,”ku iya.
Leon ke mega Mandal Chairman DAP Nengeri madah perintah nengeri patut beratka pengawa nyendia perengka guna nya, ke alai Kepala Menteri empu udah numbuhka seiti unit ke dikumbai Unit Bekal Ai Menua Pesisir.
“Penanggul suntuk bekal ai suah nuntung peranak rumah panjai lalu sida udah minta saup DAP Sri Aman, ngarika sida nulis surat ngagai perintah nengeri minta loji meresi ai digaga di Lachau.
“Loji nya ila deka nentuka peranak rumah panjai ke be- semak tau bulih bekal ai beresi ke meruan,’ku iya.
Kebuah pinta dikenatai ketegal loji ai ke lama di Pantu enda tetangkup pinta bekal ai ke majak nambah di Pantu enggau Lachau maya ke diatu, tandu iya.