Anang jampat asa ngiga pemandai
Sukung mih raban pengajar dalam ngemujurka anak kita besekula
ENGKILILI: Pemujur pelajar nyentuk ke tikas universiti endang pugu pelajar ke disemaka enggau jaku ‘tepantup ba bandir’ ngagai seseiku orang ke udah ngerawang pemandai.
Berindik ari nya, perintah seruran ngemeratka pekara pelajar nengah bajet ke besai laban nemu semina nengah pemujur pelajar aja ulih ngadaka pengereja pengawa ke landik enggau setengan pengelandik ungkup nengeri enggau menua.
Nya alai, kenu ku Kaban Kunsil Nengeri ( ADUN) Engkilili Dr Johnical Rayong Ngipa, perintah seruran bebendar ngangkatka pekara pelajar nengah meri agih belanja ke besai ninting kali mantaika bajet nengeri enggau perintah besai.
“Kitai patut nemu mansang enggau enda sesebengkah menua bepanggai ngagai makit pengereja pengawa... nya alai endang udah nyadi tanggungpengawa apai indai, pengajar enggau perintah nyediaka pelajar ngagai bala nembiak sekalika kaya tauka seranta,” ku iya.
“Baka aku empu, sekumbang nyadi pengari rayat ditu bidang pelajar antara pekara pemadu dikemerat laban aku nemu semina nengah pemujur pelajar ulih ngemansutka orang ari pekuh penyeranta.
Iya madah munyi nya rambau bejadi program Konvokesyen Raban Enda Nemu Nulis
“
Anang jampat asa maya ngiga pemandai. Enti pemutus peresa enda manah ambi mih bidang vokasional enggau teknikal laban nya ulih dikena
” ngiga pengawa ke meruan dudi hari. Dr Johnical Rayong Ngipa ADUN Engkilili
enggau Macha di Ensurai enggau Kumpang Engkilili di Dewan Serbaguna Engkilili ditu, apin lama ke udah.
Maya nya, bisi 47 iku mujur nerima setipikit pengudah sida tembu belajar Macha, Nulis enggau Ngira.
Tuju program nya dikena munaska penyampau orang ke nadai nemu nulis enggau macha nitihka atur pelajar UNESCO lalu pengawa nya dikemujurka KEMAS.
Kira 47 iku orang tuai udah dipilih nyereta program empat bulan nya ke bepun pukul 4.30 lemai nyentuk 8 malam ninting Hari Satu nyentuk Hari Enam.
Berindik ari nya, iya ngelalau bala apai indai terus besaup nyukung raban pengajar nentuka anak sida bulih pelajar ke meruan.
Ngagai nembiak ke bulih pemutus peresa ke enda manah, iya nangkan nembiak nya ngambi bidang vokasional enggau teknikal nitihka pengerindu sida empu.
“Anang jampat asa maya ngiga pemandai. Enti pemutus peresa enda manah ambi mih bidang vokasional enggau teknikal laban nya ulih dikena ngiga pengawa ke meruan dudi hari,” ku iya.
Sama bisi datai iya nya Mandal Direktor KEMAS Nengeri Sarawak Langie Liban, SAO Brin Munsang, Sekretari Opis Kaunsil Lubok Antu Bilong Engkas, Supervisor KEMAS Kanan Lubok Antu Kumpang Tutong, Pemesai KEMAS DUN Engkilili Edwin Ancheh, pengari opis perintah enggau bala tuai raban bansa.