Jabu: Inisiatif PPNS nyungkak asil betanam betupi di menua pesisir
KUCHING: Inisiatif pengawa betanam betupi ke digaga Perintah Nengeri nengah Serakup Orang Bumai Nengeri Sarawak (PPNS) disadang mantu nambahka penguntung sereta pemisi raban kebumai di menua tu, kelebih agi sida di kandang menua pesisir sereta di entigis ulu sungai.
Sapit Kepala Menteri Datuk Patinggi Tan Sri Alfred Jabu madah, inisiatif PPNS ti beratika projek timpuh ke panjai muka awak ngagai orang bumai ngambika ulih alai sida iya besemekih, lalu beratika penguntung sida ulih nambah.
“Nithka pemanah penuduk wang PPNS, taun seiti nyin tadi, asil pengawa dagang ari projek nya ngerikod penambah RM8.6 juta tauka 35 peratus (%) ngagai RM33.4 juta dibanding enggau RM24.8 juta ba taun 2013.
“Penambah tu diberi asil pemisi ari projek kebun getah begempung ari Opis Betanam Betupi Sarawak sereta servis pengangkut baja padi ari Serakup Orang Bumai Nasional (NAFAS).
“Tu nyengkaum mandangka pemanah inisiatif ti dipejalaika perintah dalam ngangkatka pengelantang pendiau orang bumai di menua tu, kelebih agi ke bisi bekait enggau pemansang menua pesisir enggau ulu ke sama bejalaika program pengawa betanam betupi di sitak ke dipilih,” ku Jabu.
Iya madah munyi nya lebuh bejadika Aum Besai Ninting Taun ke-30 PPNS di sebuah hotel entarabansa ditu, kemari.
Sama bisi enggau ngulu atur pengawa nya, Menteri Muda Pengawa Betanam Betupi ti mega nyadi chairman PPNS, Datuk Sylvester Entri Muran enggau chairman NAFAS Datuk Seri Saipolbahari Suip.
Urung 61 pengari datai ari 28 buah Serakup Sitak Orang Bumai (PPK)ke ngarika 203,958 raban orang bumai di serata menua sama bisi ngulu aum besai nya.
Jabu ti mega nyadi Menteri Pengawa Betanam Betupi Moden madah, PPNS mega deka ngaga palan pengawa dagang dikena sida ngulihka pemisi ke tetap nengah projek pemansang beratika penguntung ke betampung ba taun baru tu ila.
“Ke semua untung sebedau chukai ti dirikod PPNS taun nyin tadi manggai RM1.6 juta.
“Urung RM758,000 penguntung ulih ari pengawa dagang, RM838,000 bekait enggau puku sereta RM45,000 dirikod asil ari perengka guna ke dijual.
“Nya alai, kitai komited ngaga projek pemasang dagang komersil dalam timpuh ke panjai nithka penau program nya dalam pengawa ngulihka penambah pemisi sida iya.
“Entara projek ti dipejalaika PPNS taun baru ila, iya nya projek pemansang Zon Industri Akuakultur (AIZ) di Rambungan, Kuching sereta ngaga kilang minyak sawit di Bakong, Miri,” ku iya.
Iya madah kerejasama antara PPNS enggau PPK ngembuan tanggungpengawa ke berat dalam ngangkatka pengelantang pendiau raban serakup ngagai tikas ngembuan pemisi ke besai agi manggai taun 2030, laban bela ngembuan juluk ke sebaka.
“Aku ngarapka mayuh agi kerejasama ulih digaga di antara kededua piak dikena nentuka pemujur program ke digaga,” ku iya.