Projek dagang komersil PPNS deka disaup Sea Horse Sdn Bhd

KUCHING: Juluk Serakup Orang Bumai Nengeri Sarawak (PPNS) ungkup taun 2016 enggau 2017 ila, iya nya deka ngaga palan pengawa dagang dikena nambahka penatai pemisi nengah projek dagang komersil dalam timpuh ke panjai.

Menteri Muda Pengawa Betanam Betupi ( Serakup Orang Bumai) Datuk Sylvester Entri Muran madah antara ke diperambuka iya nya, Projek Pemansang Zon Industri Akuakultur (AIZ) di Rambungan Kuching.

Iya madah projek tu deka digaga begempung enggau Sea Horse Sdn Bhd, iya nya sebuah kompeni ke mayuh peneleba dalam kandang 15 taun tu ba pengawa nupi undang galah, sereta ngembuan kaul rintai makit ukai semina dalam menua tang mega di menua luar.

Nangkan nya ku iya, ngaga projek Pemansang Kilang Minyak Sawit di Bakong, Miri, berindik ari sebana pekebun mit sawit di sitak Beluru, Bakong ke betapi enggau penanggul nyual buah sawit di sitak sida iya, PPNS udah merambu deka muka sebuah kilang minyak sawit di Beluru, Bakong.

“Tu disukung nengah pemisi kebun sawit komersil ke besai di sitak nya kelebih agi DD Plantations Sdn Bhd enggau PELITA,” ku Entri madah maya bejaku ba atur pengawa bejadika Aum Besai Setaun Sekali (AGM) ke-30 di sebuah hotel tebilang ditu, kemari.

Nitihka rikod saham, pemegai saham kebun sawit komersil, iya nya PPNS (30%), DD Plantations Sdn Bhd (30%), NAFAS (20%), LCDA (10%), SKPK Kilang Sawit Beluru (10%).

Iya nandu baru PPNS udah ngelala sereta minta pemesai tanah urung 120 ikar di sitak Sg Laong, di Beluru, Bakong ke tuju tu. Peminta nya benung diperundingka Opis Tanah enggau Survei (JTS) Sarawak.

Kelimpah ari nya, deka ngaga sebuah kilang sawit ke bekapasiti 30 MT begunaka ungkup entara RM40 juta ngagai RM50 juta, ku iya.

“Nya alai, PPNS merambu deka bekerejasama enggau DD Plantation, NAFAS, PELITA enggau Penyereta SPKP,” ku iya.

Iya mega madahka baka Projek Pemansang Pasaraya Agro di Matang Jaya, projek tu ulih mantu orang bumai sereta kaban Serakup Orang Bumai dalam pengawa nyual asil sida iya sereta ngurangka pengawa ‘orang tengah’.

“Dalam timpuh nya mega, tu deka ngemuntangka mensia mayuh di sitak nya ngulihka bekal asil baru ari utai ke ditanam sida iya,” ku iya lalu nandu, projek tu digaga begulai enggai FAMA, NAFAS, PENESA, Opis Betanam Betupi sereta MPP.

Kelimpah ari nya mega, iya madah Projek Pemansang Palan Pengumpul Tandan Sawit Mata (FFB) di Bakong, Miri ulih mantu pekebun sawit mit di sitak Bakong.

PPNS deka numbuhka FFB di Bakong ke deka meli tandan sawit mata (cash) ari pekebun sebedau ke dianjung ngagai kilang.

“Tu ulih nyeliahka orang bumai dikelikuhka ‘ orang tengah’ ke meli enggau rega ke murah tauka enda nitihka gred,” ku iya.

Entri mega nandu baru, bekait enggau Projek Pemansang Tanah NCR kaban Serakup Orang Bumai, iya deka mantu raban pemenggi tanah NCR ke kurang modal sereta ari ngelakka tanah nya enda dikereja lalu nadai mai sebarang asil (mungkur urung 2,500 hektar) di sitak Engkilili.

“PPNS merambu deka ngemansangka sitak nya nanam sawit begulai enggau Ta Ann Holding Berhad nitih suwa ninting taun lalu penguntung dibagi ari asil nyual tandan buah baru nengah ‘Corporate Development Initiative’ (CDI),” ku iya.

Nangkan nya iya madah, Projek Nupi Kelulut nyadi seiti agi projek ke seruran disebut diatu, alai PPNS mega deka ngaga projek nya.

“Projek tu ila dbisi kaul enggau projek ti digaga raban PPK dikena ngerembaika makit. Projek begempung enggau PPK ke ngemansangka unit PPK kelebih agi utai ke ditanam dalam timpuh ke pandak,” ku iya.

Kelimpah ari nya mega, iya madah juluk pengawa dagang dalam timpuh ke pandak nengah proses tender deka diteruska nyengkaum mayuh macham projek bukai.

Entri ngarapka NAFAS ulih mantu PPNS dalam pekara ngemendarka PPNS nguna lisin nganjung bekal pemakai ngagai ejensi perintah baka ke udah dikemendar Opis Menteri Wang (MOF) – risin manuk, dagin sereta utai bukai, ngemansangka tanah puang dikena nambahka pemisi pemenggi tanah NCR.