Leka jaku ‘Allah’ nadai penanggul dikena di Sarawak
KUCHING: Sarawak deka terus ngena jaku ‘Allah’ ukai semina raban bansa bepengarap Islam tang mega sama dikena raban bansa ke ukai bepengarap Islam di nengeri tu.
Menteri Muda Pengerai Mensia Mayuh, Datuk Dr. Jerip Susil madahka pekara nya udah dipadah Kepala Menteri Datuk Patinggi Tan Sri Adenan Satem ba aum kabinet apin lama.
Ku iya, Adenan mega bisi madahka ukum ‘hudud’ tetap enda dipejalaika di Sarawak.
“Iya ( Adenan) ngambi chunto testimoni peneleba iya empu maya belajar ba sekula misyen kelia, iya ngemeranka pengawa besembiang nyauka ninting pagi nitihka chara Kristian sebedau berengkah belajar, tang iya mengkang nyadi orang Islam.
“Ba sekula nya mega (Sekula St Joseph) iya (Adenan) belajar sereta meretika bakani rayat di sarawak begulai enggau pangan diri ti mayuh pupu bansa ditu.
“Nya alai kitai ngarapka nya nyadi chunto ngagai genap serak sereta semua rayat di nengeri tu ngambika isu bansa enggau jalai pengarap enda nyadi isu ke ngeruga penyerakup bansa,” ku iya.
Dr. Jerip mansutka pekara nya lebuh dikerandau pengarang berita ba atur pengawa nyuaka ungkup belanja projek mit menua pesisir (MRP) ngagai Gerija Sidang Injil Borneo (SIB) Rekap Bunuk, Kg Bunuk, Jalai Puncak Borneo ti diatur ba Opis Menteri Muda Main asal enggau Pesaka Liwan Lagang ba Bangunan Baitulmakmur ditu, kemari.
Kelimpah ari nya, Liwan lebuh bejakuka pasal ungkup belanja MRP sepenyampau RM250,000 ari perintah nengeri ngagai Gerija SIB Rekap Bunuk ditu kemari madah, ungkup belanja nya ngayanka Adenan seiku ketuai ti beratka pengelantang rayat Sarawak ti enda ngira penatai sida rayat.
“Iya (Adenan) ukai semina bejaku aja, enti iya madah deka ngatur sesebengkah pekara iya deka madahka ngagai mensia mayuh. Baka ti dipadahka iya , iya deka mantu enda ngira sapa, iya tetap meri bantu.
“Kami (pengari SIB) meri besai terima kasih ngagai Adenan laban meri ungkup belanja sepenyampau RM250,000 tu dikena ngemansangka rumah sembiang, iya nya gerija ti dikena peranak ngelinggi Jalai Puncak Borneo,” ku iya.
Gerija SIB Rekap Bunuk baru dikena nyilih gerija mit ti udah tuai sebedau tu, ti digaga ba atas tanah pemesai urung 30 point. Nyema udah tembu ila, gerija nya ulih napi peminta guna raban Kristian ke urung 400 iku ba kandang menua dalam seiti timpuh.
Gerija nya mega ulih endur raban Kristian ngatur aum besai, seminar anak mit, seminar orang indu enggau program ke bukai.
Sama bisi datai ngagai pengerami nya kemari, Ketuai Pastor Khoo Kin Nyen, pengari Opis Pelilih Mit Kuching, Pastor Stanley Lukong enggau Sekreteri Komiti Gerija SIB Rekap Bunuk, Moin Kuer.