SPDP agi tubah mayuh penyukung di DUN Meluan
JULAU: Pelobi chalun Parti Demokratik Progresif Sarawak (SPDP) N42 Meluan, Rolland Duat nerangka pasal SPDP agi mengkang mayuh penyukung beduduk ari timbal chukup manah dipeda sekumbang program ke udah dipejalaika iya kandang Kunsil Nengeri (DUN) N42 Meluan ngelama tu.
Kenu ku iya, asil ari pejalai ngagai serata sukut menua ba kandang menua tu kenyau ari taun seiti nyin kemari, ketebal agi peranak menua nya madahka sida agi ngembuan pengarap ke besai ngagai SPDP enggau Perintah Barisan Nasional (BN), ngiring sida jemah ila.
“Mayuh macham sebana sereta buah penemu dikenataika ngagai kami lalu sida minta saup mutarka penanggul ke bisi nuntung.
“Kami pechaya nengah timbal ke chukup manah ari peranak rumah panjai, tu deka meransang kami bebendar agi bejalaika pengawa nyaup rayat ke begunaka bantu, kelebih agi bekaul enggau pemansang infrastruktur.
“Pemansang infrastruktur balat dianti rayat di kandang menua tu, lalu kami andal nyema diberi mandat ngiring rayat ditu, kami deka ngemeratka pekara tu,” ku Rolland.
Iya mantaika jaku nya rambau Pengerami Nemuai Seraya Bekelala diatur ba Rumah Banyang, Nanga Lijan Julau, apin lama ke udah.
Rambau pengerami nya, urung 300 iku peranak ari ngelingi menua nya, begulai enggau 20 iku Tuai Rumah bisi diri.
Kenu ku Rolland, ngelama tu iya sedar pasal penangul ke ditapi rayat menua tu, lalu dikena mutarka semua pekara tu, sekeda pansik udah digaga.
“Laban ke nyadi seiku peranak asal ari menua tu, kami nemu pasal pekara ti dipinta rayat ditu,” ku iya.
Tambah mega ku iya, berengkah ari diatu, fokus kami deka terus nirika penegap SPDP sereta mulaika baru pegari nama, penyerakup ba raban nya sereta pechaya ba ati rayat ngagai kami ngetuai sereta ngemansangka sida.
“Kitai deka terus bejalaika pengawa ngerejista raban pengundi kelebih agi raban nembiak sereta iya ke bukai ti pechaya sereta deka begulai gawa enggau kami.
“Sekali tu, kami deka bebendar ngereja pengawa meri pemerat ngagai pengawa matak mayuh agi raban nembiak ngambika chakah agi nyereta diri dalam bidang politik, kelebih agi iya ke tebuka enggau manah.
“Taja piya, pengelebih kami iya nya rayat, kebuah nya mega kami seruran nentuka rayat dikemeratka ukai semina dikaul aja tang mending sereta beratika peminta enggau peneka sida lalu udah nya baru ngiga chara dikena mutarka penangul ke ditapi sida,” ku Rolland.
Ku Rolland nandu baru, raban SPDP patut bekerejasama enggau jentera parti BN ke bukai kelebih agi dalam nentuka perintah enggau ketuai BN terus diau ba ati rayat sereta dipechaya, tu pekara ke meri kitai menang ba penuduk rambau Pengawa Bepilih Nengeri (PRN) tu ila.
Bela bisi datai rambau pengerami tu iya nya Raban Exco SPDP, Ting Kiew Ming, Mandal Chairman SPDP N41 Pakan, Kaunsilor Barau Bandan enggau Dr. Jawie Jinggut.