Pemutus minta 20% royalti minyak ukai penemu ditempa kediri
KUCHING: Pemutus Perintah Nengeri ke minta 20 peratus royalti minyak endang penemu dipesetuju semua kabinet nengeri, ukai penemu ari seiku orang aja.
Menteri Pengawa Berumah Datuk Amar Abang Johari Tun Openg madah kabinet nengeri bisi sistem iya empu alai sebarang pemutus ti digaga dalam pekara ngulihka royalti minyak disetuju ulih semua lalu ukai pemutus ditempa kediri aja.
“Pemutus nya disetuju semua kabinet, laban kabinet bisi sitem kediri empu. Kepala Menteri Datuk Pat- inggi Tan Sri Adenan nyadi pengari bejakuka pekara nya. Nambah enggau nya, nengah sistem tu sigi bisi komiti iya empu ti betuaika Sekretari Nengeri endur berundingka pasal peminta tu.
“Sebaka enggau autonomi ke endang bisi komiti dalam mutuska pekara autonomi ke patut diambi perintah pulai baru,” ku Abang Johari lalu nandu baru, pemutus Kepala Menteri disukung semua kabinet 100 peratus.
Iya madah munyi nya ba aum media pengudah bejadika sebengkah licha apin lama ke udah seraya nimbal penemu penyakal (DAP) ke ngumbai kabinet nadai nyukung Kepala Menteri dalam pekara ngulihka royalti minyak ti patut diberi pulai baru ngagai nengeri tu.
Nimbal pasal pekara nya, Abang Johari madah sebedau penyakal ngemansutka pasal pekara tu, sida patut beratika kaul sereta penanggul ke ditapi sida empu laban.
“Ba DAP empu, pengawa ti digaga sida empu pan nadai disukung PKR. Ku jaku nyukung, tang ba penemu aku, sida nadai nyukung pangan diri. Sida ngumbai diri begempung, tang diatu, macam-macam parti baru ditumbuh,” ku Abang Johari.
Ba rintai chalun baru ti deka dikirai Parti Pesaka Bumiputera Bersatu Sarawak (PBB), Abang Johari ti mega nyadi Sapit Presiden Kanan PBB madahka bisi chalun baru diangkat ngarika PBB ba Pengawa Bepilih Kunsil Nengeri (PRN) tu ila.
“Sigi bisi mua tauka chalun baru ke deka dibantaika PBB, tang ni pemayuh nya bepanggai ba pemutus Kepala Menteri.
“Kami PBB tetap bisi atur, nya alai tiap pengawa bepi- lih sigi bisi mua baru. Tang awakka Kepala Menteri netapka pekara nya, nyangka bisi Indu tauka ari raban Nembiak.
“Dalam PBB, kami sigi seruran ngelatih orang baru, nya ke dikumbai atur baru, lalu dalam timpuh ke sebaka mega, tuai-tuai ke baru ulih meri penemu ke baru laban perintah enda tau enda dinamik, nitihka gintir. Menteri pan enda tau enda nitihka gintir sebaka enggau orang dagang,” ku iya seraya madahka PRN deka diatur sebarang maya sebedau Jun 2016.