Komiti Kort Bumiputera Iban Sibu bisi baum pasal adat maya ba dalam kort
SIBU: Adat maya ba Kort Bumiputera antara pekara ke bisi dikerandauka Komiti Kort Bumiputera Iban Sibu ba aum ninting komiti nya, ensana.
Chairman komiti, Pemancha James Semilan Guang madah, tuju semua pekara nya dikena nentuka atur pengawa pechara ba Kort Bumiputera lanchar.
“Agi bisi mensia mayuh enda nemu adat tauka atur ke patut dititih maya datai becharaka sesebengkah kes ba kort,” ku iya madah ngagai pemberita pengudah aum nya.
Ketegal ari agi bisi orang enda mereti, ngujungka utai ke nyadi ba kort nyau enda ulih jaga, kelimpah sida ke bisi datai enda bebasaka tuai raban bansa ke nyadi akim mendingka sesebengkah kes.
Nengah randau ke udah diatur, komiti ngarapka ulih ngajar mensia mayuh bekaul enggau pekara nya, seraya bejalaika atur ke bekaul.
Bela bisi dikerandauka ba aum nya ngenang pasal pengawa kahwin enggau sarak ba raban bansa Iban, kelimpah Adat Iban 1963.
“Tu dikena ngemanahka pengurang bekaul enggau Adat Iban enggau utai bukai,” iya madah aum nya bisi digulu 23 iku nyengkaum temenggung, pemancha, pengulu enggau mandal kort.
Kenu ku James, tuju aum nya dikena berandauka penanggul ke ditapi bala tuai raban bansa dalam mutarka sesebengkah penyarut.
Kelimpah ari nya, ku iya aym nya mega bisi berandauka jalai ke pemadu manah dikena mutarka sesebengkah penanggul ke nyadi di menua diri empu.
Kelimpah ari James, kaban komiti bukai iya nya Temenggung Stanley Geramong ke nyadi Penyanding Penemu, Pengulu Philip Kayak (Mandal Chairman), Cathrine Nain (Sekretari), Pengulu Richard Ampi ( Mandal Sekretari), Pengulu Jeffery Sut (Tukang Wang) enggau Tuai Rumah Aggup Ngelambai (Mandal Sekretari).