Penanggul projek RES di Ulu Paku, Undop deka teputar enda lama agi

SRI AMAN: Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis madahka, penangul projek Bekal Kuasa Karan Menua Pesisir ( RES) ba Ulu Paku, Undop, Batu Lintang enggau kandang menua ngelingi nya deka teputar enda lama da agi.

Kenu ku Harden, ungkus RES penyampau RM12 juta nya udah dipejalaika kenyau ari tiga taun ke udah lalu ke diatu apin tembu.

Penangul tu bepun ari penangul neresa tanah ke dikena nirika tiang karan nya ke ngaul raban peranak menua nya, kunterikta enggau kompeni kebun sawit dandang besai ditu, ku iya.

“Nya alai, kitai deka ngatur sebengkah randau begulai enggau ketetiga piak tu dikena mutarka penangul nembuka projek RES ba kandang menua Ulu Paku nya,” ku iya.

Harden mantaika jaku nya rambau bejaku bejadika Pengerami Pemesai Begulai enggau Rayat sereta Bejadika Jalai Kampung ba Rumah Gunong Kanang, Samak Ulu Undop Batu Lintang, Sri Aman, apin lama ke udah.

Iya ke mega nyadi Kaban Kunsil Nengeri ( ADUN) Simanggang minta peranak menua ba Ulu Paku meri kerejasama ngagai raban kunterikta ke bejalaika projek nya.

Ku iya, rayat di menua nya patut sedar laban projek RES deka mantu ngangkatka tikas pengidup sida enti iya ulih dipejalaika enggau mujur lalu nadai ngaul pengawa bekenaka tanah nya.

“Berunding mih ke pengidup anak enggau uchu kita jemah ila. Iarka tisi pekara ke tau nekul projek tu laban pemuntan iya ulih mai pengerugi ngagai peranak di menua pesisir Ulu Paku,” ku iya.

Nyempulang pengerami nya, Harden ngemendarka geran projek Pemansang Mit Menua Pesisir (RMP) penyampau RM6,000 ngagai Komiti Pemansang enggau Pengelikun Genturung Pendiau ( JKKK) Rumah Gunong sereta RM2,000 ungkup Biro Indu.

Masir rambau pengerami nya mega bisi ngungkupka agih belanja penyampau RM20,000 dikena ngemanahka Rumah Panjang Samak Ulu Undop sentara RM5,000 diungkupka ngagai gerija mit di menua nya.