Pengundi di DUN Samalaju ngarapka chalun PRS ulih bediri ba sitak nya

KUCHING: Raban pengundi ba sitak baru Kunsil Nengeri ( DUN) Samalaju ngansak Parti Rakyat Sarawak ( PRS) meratika silik sentang chalun ke deka bediri ba penuduk nya ba Pengawa Bepilih Nengeri (PRN) tu ila.

Tuai Rumah Banyang Ramai madah, pengari ari PRS endang patut bediri ba penuduk nya berindik ari pengundi dia ketegal agi raban bansa Dayak.

Nitih ku iya, sitak Samalaju bisi 12,927 iku pengundi ke udah rejista, iya nya nyengkaum 62 peratus bansa Iban, 23 peratus (Melayu/ Melanau) sereta iya ke bukai pengundi China.

Ku iya nambah, penuduk PRS chukup tegap ba kandang menua nya ngelui ari sitak Kunsil Nengeri (DUN) Kidurong enggau Kemena.

“PRS nyadi parti ketebal agi bepelasarka raban bansa Dayak, deka teulihka sukung kuat ari raban bansa Dayak ba sitak nya.

“Nya alai aku andal amat ati, PRS tu ulih nyadi pengari ke pemadu manah dikeandalka ulih menang ungkup BN ba sitak nya,” ku Banyang lebuh iya nyuaka pom peminta nyadi kaban ngagai Presiden PRS, Tan Sri Datuk Amar Dr James Jemut Masing, ba rumah panjai iya apin lama ke udah.

Kelimpah ari beratika Kidurong, PRS mega meri perati ngagai Bukit Goram ba Kapit enggau Murum ba Belaga, ke udah dulu diperimba pengari PRS ba sitak Baleh di Kapit enggau sitak Belaga di Belaga.

Tiga ari 11 buah sitak nya baru ditumbuh Komiti Pengawa Bepilih Menua (SPR) pengudah iya teulihka pemendar ari Parlimen lalu dipesetuju Agong. Lapan penuduk baru ke bukai iya nya Serembu, Batu Kitang, Bukit Semuja, Stakan, Gedong, Kabong, Tellian enggau Mulu.

Sentara nya, Masing ke mega nyadi Menteri Pemansang Tanah madahka peranak rumah panjai Rumah Banyang mega minta tanah Adat Bansa Asal (NCR) sida diberi surat pala tanah.

“Pekara ke dipinta sereta dikemeratka raban tu bekaul enggau tanah NCR kala disukat Opis Tanah enggau Survei Miri dalam taun 1970 laban maya nya Bintulu agi dibaruh Bagi Menua Keempat tauka diatu dikelala nyadi Bagi Menua Miri.

“Taja pia, pengudah 40 taun pekara nya dipejalaika, sida bedau mujur teulihka pala tanah.

“Bisi sekeda orang ke bempu tanah nya udah midang lalu peturun sida sereta orang ke agi idup minta raban otoriti bekaul ngambika mutarka pekara nya ketegal sida udah kelalu lama nganti,” ku iya.

Ku Masing, pekara tu bepun ari gaya tanah NCR sida kurang ami sereta nadai rega ba pekara ekonomi lalu tu ngujungka tanah nya enda dikemansangka.

Pengerami nya mega bisi digulu dua iku Sekretari Politik Kepala Menteri, Wilson Nyabong enggau Majang Renggi ke mega nyadi Mandal Presiden PRS disempulangka seiku orang dagang, Dato Hii Poh Beng.