‘DAP Dayak Blueprint’ deka nyadi manifesto maya PRN ke deka datai

KUCHING: DAP Dayak Blueprint ti disain udah raban ketuai Dayak ba Indu Opis Parti Tindakan Demokratik (DAP) kemari deka diangkat nyadi manifesto parti rambau pengawa bepilih nengeri (PRN) ke deka datai.

Paul Raja, seiku ari 12 raban ketuai (profesional Dayak) ti nyereta DAP kemari madah sida deka bebendar nentuka manifesto nya dikeamat ungkup pemaik Dayak ti udah lama dikelaung.

“Enti Dayak deka ngemansutka diri ari pemerinsa, enggai dikelaung sereta enggai agi tinggal ba semua pekara pemansang, sida patut meri sukung ngagai DAP berengkah diatu.

“Enti enda pia, kitai Dayak enda ulih ngubah pemerinsa ke diasai diatu lalu aku pan enda nemu nama penyadi kitai jemah,”ku iya bejaku ngagai pemberita di Indu Opis DAP kemari.

DAP Dayak Blueprint ti disua ngagai Chairman DAP Sarawak Chong Chieng Jen kemari ngerintai tujuh pekara ungkup pemaik bansa Dayak.

Tujuh pekara nya nyengkaum kaul bansa Dayak ba pekara politik, hak ba tanah NCR, pemansang bansa Dayak, pemansang perengka guna sereta infomasyen ungkup bansa Dayak, Indentiti Dayak enggau minta Perintah Besai meri basa sereta ngamatka Sempekat Malaysia 1963.

Berindik enggau nya Paul ngansak komuniti Dayak muka runding enggau mata sida ngambi tau meratika pekara sereta utai ke udah nyadi ngagai bansa Dayak dalam timpuh 52 taun ke udah enggau silik.

Ku iya parti ti ngarika bansa Dayak maya ke diatu udah enda bejalaika tanggung pengawa nitihka pematut.

“Aku ngansak komuniti Dayak majak nyukung DAP. Parti tu ulih nentuka pinta enggau peneka kitai Dayak nyadi nyata, sida deka bejaku ngarika kitai.

“Berindik ari pengeransing DAP ke deka nyaup bansa Dayak, aku sekali agi nesau bansa Dayak sama nyukung parti tu,” ku iya.

Parti deka nyabung chalun bediri ba mayuh sitak pengawa bepilih di kandang menua Dayak lalu tu meh maya kitai ngaga ubah, nukar perintah, ku tandu Paul.