Pemutus 12 iku ketuai Dayak meri DAP pengaga
Kemari sida bela seretai nyadi kaban baru DAP seraya nyain ‘DAP Dayak Blueprint’ ke pemaik bansa Dayak
“
Raban sida tu deka nyaup ngeringka rayat ba kandang menua pesisir sereta mega nyaup transfomasyen DAP ke nyadi sebengkah parti ungkup semua bansa di
” Malaysia.
KUCHING: Bisi 12 iku ketuai Dayak ke regas dalam gerempung ukai dikuasa perintah (NGO) nyengkaum enam iku ex-kaban Parti Keadilan Rakyat ( PKR) udah ngaga pemutus nyereta Parti Tindakan Demokratik (DAP) kemari.
Ba seiti pengawa mit ke diadu di Indu Opis DAP ditu, raban profesional Dayak tu nyain pom ngerijista masuk DAP seraya dikemata Penyanding Penemu DAP renggat menua Lim Kit Siang sereta Chairman DAP Nengeri Chong Chieng Jen.
“Sigi ngena ba maya ke diatu dia seraban ketuai bansa Dayak netapka pemutus nyereta DAP.
“Raban sida tu deka nyaup ngeringka rayat ba kandang menua pesisir sereta mega nyaup transfomasyen DAP ke nyadi sebengkah parti ungkup semua bansa di Malaysia.
“Tu mandangka semua pengawa ke udah digaga parti meri pemaik ke semua bansa di Sarawak enggau Malaysia ukai semina ungkup komuniti China aja tang mega diakun komuniti Dayak,”ku Chong
Chong Chieng Jen Chairman DAP Sarawak
bejaku ngagai pemberita.
Chong ke mega ADUN Kota Sentosa enggau Kaban Parlimen Bandar Kuching pechaya kaul raban Dayak dalam DAP deka ngubah gaya politik di nengeri tu kelimpah ti nyaup matak mayuh agi Dayak nyereta DAP.
Sehari tu kitai mungkal lambar baru dalam sejarah DAP Sarawak sereta mega politik di Sarawak ke alai kerejasama tu deka ngubah pendiau politik nengeri tu ungkup pemaik enggau pengelantang semua bansa enggau semua peranak Sarawak, tandu Chong.
Ngarika sida seraban, Paul Raja ( seiku luyar) madah pengawa raban ketuai Dayak (perintah) ke diatu ti udah enda mujur mai pemansang sereta ngenatai pinta enggau peneka bansa Dayak nyadika kebuah sida ngalih nyereta DAP.
Ku iya dalam timpuh 52 taun bansa Dayak ukai semina dikelaung tang udah enda dikeingat agi ba semua bengkah program pemansang.
“Semua penanggul ke ditapi Dayak diatu asil ari pangka politik ke nyadi maya ke diatu. Dulu suba kitai bansa Dayak chukup tegap, diatu kitai udah mupuk enda dikeibuh sereta enda diguna agi.
“Ketegal pekara ke nyadi ba politik Dayak, kitai ngasai tu meh maya nyereta DAP ti disetuju ketuai DAP ba renggat menua enggau nengeri. Parti nyendia tusun pengawa ti chukup manah,”ku Paul.
Ba pengawa nya kemari, sida seraban bisi nyain ‘DAP Dayak Blueprint’ ti ngerintai tujuh pekara ungkup pemaik bansa Dayak.
Tujuh pekara nya nyengkaum kaul bansa Dayak ba pekara politik, hak ba tanah NCR, pemansang bansa Dayak, pemansang perengka guna sereta infomasyen ungkup bansa Dayak, Indentiti Dayak enggau minta Perintah Besai meri basa sereta ngamatka Sempekat Malaysia 1963.
Ba jaku pandak rambau pengawa, Lim madah DAP udah nempa seiti agi sejarah baru lalu ngarap kaul raban Dayak ulih ngubah gaya politik nengeri sereta menua tu.
Kelimpah Paul raban bukai ke nyereta DAP kemari iya nya Richard Lias, Philip Tero, Baba Emperan, Ali Basah, Frankie Bedindang, Douglas Alau, David Kalom, Granda Aing, Robert Tella, Edward Agong enggau Gabriel Ajan Jok.
Nitihka penerang Chong, enda lama agi sekeda agi raban ketuai Dayak deka nyereta DAP.