ADUN Ngemah besemaya mantu peranak Rh Pankras, Ulu Pedai ngentak rumah baru
KANOWIT: Juluk peranak Rumah Pankras Sebestian ke deka ngentak rumah baru penyampau 16 pintu di Ulu Pedai deka dibantu Kaban Kunsil Nengeri ( ADUN) Ngemah Alexander Vincent.
Dikena ngamatka juluk nya, Alexander besemaya deka nyaup meri belanja sepenyampau RM50,000 ti dibagi ngagai dua bengkah renggat.
Maya ke bejaku ba pengawa nasih taba rumah panjai baru nya, ku Alexander, rayat ba DUN Ngemah anang nangika diri tinggal ari pemansang nyengkaum pengawa ngentak rumah panjai baru baka nya laban DUN nya semampai nerima bantu ari perintah.
Ku iya, bantu baka nya endang semampai bisi lalu deka lebih agi diasaika rayat dia ba taun-taun nangkan ke tu ila.
“Taja pia kita patut pechaya ke aku laban enti aku besemaya, semaya nya enda kala balang.
“Nadai kebuah kitai ba DUN Ngemah tu enda ulih mansang enti kitai semampai bisi ungkup diberi perintah belama,” pia ku iya madah.
Bela bisi datai maya tu iya nya Kaunsilor Luang Barieng, Pengulu Bernabas Angkis, Pengulu Juin Adan, Pengulu Ijam Tuah enggau Tuai Ru- mah Pankras empu.
Maya berandau enggau pengarang berita, ku TR Pankras madah, sida mutus deka mindah ari palan rumah panjai kediatu laban penyampau tubuh sida serumah majak nambah.
“Kediatu kami bisi 10 pintu tang ketegal enam pintu agi deka nampung kami ngaga pemutus deka ngentak baru laban tanah alai kami berumah diatu enda chukup alai sida enam pintu tu nampung.
“Kami pechaya pengari rayat menua tu ulih bejadika juluk ati kami serumah deka meda rumah panjai kami ma- jak nambah pemanjai ba tauntaun ti deka datai,” pia ku iya sambil madah rumah panjai alai sida ke diatu udah dientak lebih 40 taun ke udah.