Kompelin raban pemeresi HUS ke nadai dibayar gaji penuh patut dibai ngagai JTK
KUCHING: Raban pengereja pengawa ke gawa nyadi pemeresi di Sepital Besai Sarawak (HUS) ke madahka diri nadai nerima gaji penuh kira dua bulan udah, diatu diasuh ngaga kompelin ngagai Opis Pengereja Pengawa di nengeri tu.
Menteri Penguasa Pengereja Pengawa Dato Sri Richard Riot madah pengereja pengawa ke gawa baruh kunterik sebuah kompeni peribit di nengeri tu ke enda nerima gaji penuh sida iya tau madahka penanggul nya ngagai Opis Pengereja Pengawa (JTK).
“Pengereja pengawa tau ngelawa lalu madahka pasal penanggul nya ngagai JTK tang kami mega bisi palan bukai endur madah, iya nya ngagai Opis (Industrial Relations),” ku Riot.
Iya madah munyi nya lebuh nimbal pasal berita pengereja pengawa di HUS ke nyadi pemeresi di sepital nya ti digaji sebuah kompeni semina nerima RM550 sebulan ( dalam kandang dua bulan tu ke udah) lalu nya enda nitihka baka ke patut, iya nya RM800 sebulan, pengudah bechairmanka aum media bekait enggau atur pengawa ‘Majlis Konvokesyen Institusi Latihan Jabatan Tenaga Manusia Kementerian Sumber Manusia kali ke-11 / 2015 ( ILJTM) Wilayah Timur Zon Sarawak’ di Palan Konvensyen Borneo Kuching (BCCK), kemari.
Bedau lama tu ke udah, raban pemeresi kunterik ke gawa ba sepital nya enda lantang ati lebuh nerima gaji semina RM550 sebulan ( dibayar dalam kandang dua bulan tu ke udah), taja pan ku sida iya udah ngaga kemplin ngagai kompeni nya, tang nadai timbal ari kompeni nya.
Riot nandu, Opis Menteri nya (KSM) bisi opis (Industrial Relations) di Kuching nyengkaum bisi Kort Industri (Industrial Court), alai madah pasal penanggul ke ditapi maya gawa tauka nuju opis JTK madah pasal penanggul nya.
“Pengereja pengawa kunterik HUS ke betapi enggau penanggul nya tau madah ngagai JTK, ngambika mansik kes nya,” ku iya.
Bekait enggau kempelin nya, duit Wang Turu Pengereja Pengawa (KWSP) mega nadai dibayar ngagai KWSP, Riot madah pekara nya baruh tanggung pengawa Opis Menteri Wang (KKM), enti sema sida iya deka ngaga kempelin pasal pekara nya.
“KWSP nya dikuasa KKM ke tau alai sida (pengereja pengawa kunterik HUS) ngenataika kompelin,” ku iya.
Ba taun baru tu ila, gaji ke pengabis mit deka ditikika ngagai RM920 ungkup rayat di Sabah enggau Sarawak, baka ke udah dibantaika Menteri Besai dalam Bajet 2016 apin lama ke udah.