Undang-undang saman bekaul enggau rampa menua deka dipansik baru
KUCHING: Opis Menteri Pengeraja Asal enggau Rampa Menua deka beratika baru undang-undang dalam Akta Alam Sekeliling 1974, lebih agi ke bekaul enggau bayar saman.
Menteri iya, Dato Sri Wan Junaidi Tuanku Jaafar madahka pengawa deka beratika undang-undang ti bekaul enggau bayar saman nya patut bendar diubah setipak enggau gaya enggau ubah pemansang menua diatu.
“Kitai deka beratika baru undang-undang dalam Akta Alam Sekililing 1974 lebih agi ke bekaul enggau bayar saman. Undang-undang nya kala diubah tang kekadang orang ilap peda bekaul enggau saman tu.
“Rayat minta aku beratika baru undang- undang nya ngambika penyampau saman nya ulih ditikika agi laban ukum naka RM500,000 tang saman RM2,000, disebut peranak menua luar kelalu mit sereta enda engkeman dikena diatu.
“Nya alai aku begulai enggau bala pemesai, ketuai sekretari sereta pemesai undang-undang deka beratika baru undang- undang tu ngambika setipak enggau penyalah. Genap pengawa betunu ba di belakang rumah, kilang besai tauka kebun dandang besai penyampau bayar saman enda sama,” ku iya.
Wan Junaidi nerangka pekara nya dalam aum pengarang berita pengudah bejadika Pengerami Minggu Rampa Menua Malaysia 2015 Rengat Nengeri Sarawak ke diatur Opis Rampa Menua Sarawak ba Medan Niaga Satok ditu, ensana.
“Undang-undang tu senipak dikemeranka di serata menua kitai, taja pia ketegal bisi berita ngerimbai pending madahka peminta penerit undang rampa menua diberi ngagai perintah nengeri,” ku iya.
Lebuh bejaku ba pengerami nya iya madahka, dalam timpuh belabuh ari 1 Januari nyentu 27 Oktober 2015, bisi 3,591 kes nunu nyadi di serata menua.
“Semua kes nya ( 3,591 kes) nyengkaum pengawa nunu kampung bisi 603 kes, endur bekebun bumai (1,216 kes), industri (21 kes), taba berumah (82 kes), taba tugung uras (97 kes), babas (694 kes) enggau ke bukai bisi 878 kes.
“Dalam timpuh ke sama (1 Januari ngagai 27 Oktober 2015), bisi 227 kes udah disaman, 16 kes dikeluarka Notis Gerah, 42 kes Surat Gerah enggau 23 Keretas Pansik benung dipejalai ngambika diputarka ba kort” ku iya.