Skim Lon Rumah Panjai patut diberi terus ke rayat, ukai ngena chara tendar
KANOWIT: Skim Lon Rumah Panjai ti ditiki ngagai RM50,000 deka mai pengelantang ngagai peranak rumah panjai ngasaika pengidup ti meruan agi.
Kaban Parlimen Kanowit Datuk Aaron Ago Dagang madah, penyampau ke ditiki ari RM10,000 sebedau tu dipebalaka chukup dikena rayat ke deka ngentak baru tauka ngemanahka rumah panjai ti udah lama.
“Skim tu udah dirintai ba Bajet 2016 ke dibantai Menteri Besai Datuk Seri Najib Tun Razak empai lama tu tadi ti diubah baru ari penyampau ke suba ungkup nengeri Sarawak enggau Sabah.
“Mensia mayuh ke mujur ngelun ari skim tu nadai dipinta mayar bungai iya,” pia ku iya madah.
Iya mantaika jaku tu maya datai bejadi Program MEMBARA Citra Seni Budaya P. 210 Kanowit ke diatur begulai Opis Pekara Khas (JASA) P.210 Kanowit eng- gau Komiti Pengelikun Pendiau (JKKK) Rumah Richard Remang di Pedai ditu, kena Hari Enam tu tadi.
Program tu bela digulu Kaban Kunsil Nengeri (ADUN) Ngemah Alexander Vincent, Pemesai JASA P. 210 Kanowit Priscillina Petrus, Pemesai Opis Pemadah Kanowit Donny Minggu Ling, Direktor Komiti Komunikesyen enggau Multimedia di Nanga Tada Barbara John Perry bala penghulu enggau bala kaunsilor menua nya.
Nambahka nya, Aaron madah, nyema langgur nambahka penyampau skim nya nyadi udah tu ila, iya ngarapka ulih diberi terus ngagai peranak rumah panjai empu tang ukai ngena chara tender.
“Enti betender penyampau nya enda diberi ngagai peranak rumah panjai nitihka penyampau ti kebendar.
“Nya alai, kita empu meseti beterus terang madahka diri enggai ngelun skim tu enti betender laban lun tu ila ukai orang bukai mayar tang kita empu,” ku sambil ngarapka bantu nya dikena enggau manah nyentuk projek ke dipinta mujur ditembu.
Berebak enggau tu Aaron bisi nyebut senentang penanggul ke ditapi raban graduate ke mayuh empai bulih pengawa ti entap.
Ku iya, seiti ari kebuah penanggul tu nyadi ketegal sida enda ngembuan pengelandik bejaku English ti nyadika pelasar alai kompeni tauka opis perintah milih raban pengereja pengawa.
Ngenang Pengawa Bepilih Nengeri (PRN) ti deka datai, Aaron minta rayat dia semampai nyukung chalun ke dipilih ngarika Barisan Nasional (BN) bepun ari pengeransing Kepala Menteri Datuk Patinggi Tan Sri Adenan Satem ngaduka enggau naka pemanah polisi perintah nengeri tu.
Dulu agi ari tu, Alexander ti bela nyebut pekara nya minta rayat anang ngelebu Adenan ti tampak ngarika semua bansa rayat di nengeri tu ngulihka tikas pengidup ti lantang agi nengah pengawa iya ti ngaduka mayuh bengkah ubah sekumbang ke nyadi Kepala Menteri.
“Ari macham bengkah ubah ke digaga iya ngelama tu rayat patut meri iya awak baru ngambika iya mengkang nyadi Kepala Menteri kitai.
“Pia mega, enti kita di DUN Ngemah ditu agi deka nguna aku nyadi pengari rayat aku endang bediri maya PRN tu ila.
“Tang taja pan baka nya pemutus nentuka chalun bepanggai ba sida ketuai BN,” pia ku iya madah.
Kelimpah ari nya, Alexander mega maya tu minta rayat dia ulih nyediaka sebengkah sukut alai ngaga library ba rumah panjai sida.
Ku iya, library tu deka disempulang enggau penerang tauka kereban bacha nyengkaum surat berita ngambika sida semampai nitihka berita ti bisi nyadi.
“Kediatu pekara tu empai bisi dipeda kitai digaga enggau mujur.
“Ngarapka udah tu ila, kita ulih nyediaka library ba rumah panjai kita,” pia ku iya madah baru.
Program ke diatur sehari nya disempulang enggau tiga bengkah pekit baka Pekit Gagong, Pua Kumbu enggau Tangu.
Tuju program tu diatur laban deka ngembing rebak baru bela ngetanka pengawa lama bansa Iban kelimpah nerenakka pengerindu sida ba pengawa nya.