Pengerami ngintu Hari Krismas 2015 SADIA Kuching bela digulu raban SADIA ari Limbang
KUCHING: Pengerami ngintu Hari Krismas 2015 Gerempung Dayak Iban Sarawak (SADIA) pampang Kuching ke diadu bedau lama tu tadi nerima bala temuai ari SADIA pampang Limbang.
Penatai sida seraban 20 iku diuluka Chairman pampang Limbang Jerry Saraie lalu disambut Chairman pampang Kuching Datuk Paduka Dr Anthony Nait ba sebuah hotel ditu.
Pengerami nya mega bela digulu Presiden Sarawak Dayak National Union (SDNU) ke mega Menteri Pemansang Rama, Tan Sri William Mawan.
Ba jaku rambau pengerami, Jerry madahka penemuai sida ari Limbang ketegal deka bekunsi penemu sereta peneleba enggau kaban di Kuching ngambika tau bela nyaup ngenegap serakup.
“Kelimpah ari nya, penemuai tu mega diatur enggau tuju ngerapitka kaul entara raban SADIA lalu seraris enggau rambai jaku pengerami ‘Ngetanka Main Asal Chara Beduruk’,” ku iya.
Jerry udah nya minta SADIA pampang Kuching bebala mayuh nemuai ngagai Limbang, malas penemuai sida.
Nimbal pinta nya, Anthony netap SADIA pampang Kuching setuju nemuai ke Limbang ba taun 2016 tu.
Anthony ngenataika pengaga enggau penatai sida seraban ari Limbang nyengkaum Pemancha Willy Marum, Penghulu, raban Kaunsilor enggau 14 iku tuai rumah kelimpah raban komiti SADIA pampang Limbang.
Ku Anthony, SADIA pampang Limbang ngembuan kaul ti rat enggau pangan diri lalu ngujung semua perambu sereta juluk mudah dikemujur.
Ngenang kaul bukai, Anthony nyangkal tuduh sekeda orang ti madah SADIA pampang Kuching nyadi seiti gerempung ti tebal agi deka nyakal perintah.
“Tuduh nya enda amat, komiti kami SADIA ditu diarika orang gawa perintah enggau raban tuai rumah,” ku iya.
Bela datai sapit chairman SADIA pampang Kuching Peter Moni, Chairman Pengatur Pengerami Philip Sampurai enggau Chairman UPP pampang Batu Kawa Liu Thian Leongti lalu ngena awak nya meri RM3,000 ungkup SADIA ( Kuching).