Sitak N.70 Samalaju bedau diempu sebarang parti
MKT BN deka baum enda lama agi berandauka pasal sitak baru ti deka dipedua ba parti dalam serakup BN
KUCHING: Sitak baru N.70 Samalaju bedau sah diempu Parti Rakyat Sarawak (PRS) lalu pia mega parti bukai dalam serakup Barisan Nasional (BN).
Sekretari Besai PRS, Datul Wilfred Nissom lebuh dikerandau kemari ngenukuka sitak nya bedau sah diempu PRS seraya ngakun parti sigi bisi ngining sitak nya.
“Naka ke diatu, ketuai renggat tinggi BN bedau netapka pemutus sitak N.70 Samalaju diempu PRS tauka parti bukai dalam serakup BN.
“PRS sigi ngining Samalaju lalu parti bukai pan bela keran ngempu penuduk nya nyengkaum Parti Demokratik Progresif Sarawak (SPDP),”ku iya.
Nissom pechaya ketuai renggat tinggi BN ulih berundingka pekara nya eng-
“
Naka ke diatu, ketuai renggat tinggi BN bedau netapka pemutus sitak N.70 Samalaju diempu PRS tauka parti bukai
” dalam serakup BN. Datul Wilfred Nissom Sekretari Besai PRS
gau silik sebedau netapka parti ti deka ngarika BN di Samalaju rambau pengawa bepilih ti deka datai.
Iya nambah, Komiti Kereja Renggat Tinggi (MKT) BN deka baum ba awak ke semak berandauka sentang agih penuduk baru nya lalu deka dibagi entara parti dalam serakup BN Nengeri.
Taja pia, Nissom netap PRS sigi udah bisi chalun iya nya Majang Renggi enti sema sitak Samalaju diberi ngagai parti.
N.70 Samalaju entara seiti ari 11 sitak baru Dewan Undangan Nengeri (DUN) ti dikemendar ditumbuh lalu nambah penyampau DUN ari 71 ngagai 82.
Sitak baru ke bukai iya nya N.13 Batu Kitang, N.17 Stakan, N.18 Serembu, N.23 Triboh, N.26 Gedong, N.40 Kabong, N.57 Tellian, N.63 Selirik, N.66 Murum enggau N.78 Long Lama.
Ba Pengawa Bepilih Nengeri (PRN) 2011, PRS diagih semilan penuduk iya nya Balai Ringgin, Bukit Begunan, Batang Ai, Balleh, Tamin, Kakus, Pelagus, Belaga sereta Ngemah tang alah di Pelagus ngelaban chalun ngatika diri, George Lagong.