Aum magi sitak baru deka diatur enda lama agi
SERIAN: Aum pasal pengawa magi 11 sitak kunsil nengeri (DUN) baru Sarawak entara parti komponen Barisan Nasional ( BN) deka diatur enda lama agi.
Sekretari Besai BN Nengeri, Datuk Dr. Stephen Rundi Utom madahka nya senipak enggau Pengawa Bepilih Nengeri (PRN) ti deka diatur sebarang maya ari diatu.
“Naka ke diatu maya baum bedau diputuska, tang aum nya deka diatur enda lama agi kelebih agi bekaul enggau pengawa magi sitak DUN baru.
“Kami deka ngenukuka sitak DUN baru nya deka dipedua enggau nadai bechiping entara parti kompenan BN,” ku Sekretari Besai Parti Pesaka Bumiputera Bersatu (PBB) lebuh ditanya bekaul enggau pekara nya, seraya iya madahka Kepala Menteri ti mega Chairman BN Nengeri Datuk Patinggi Tan Sri Adenan Satem bisi baum enggau tetiap parti komponen BN sentang pekara nya.
Dulu ari nya, Menteri Muda Perengka Guna Mensia Mayuh nya meri licha bekaul pasal ‘Senario Politik Semasa & Peranan Belia’ ba Gempuru Nembiak Tebedu 2016 ti diatur Pampang Nembiak enggau Indu PBB DUN N.21 Tebedu ba Dewan Tayung Langui, Kpg Pichin ditu, kemari.
Nambahka nya, lebuh ditanya sekalika aum nyengkaum parti TERAS enggau UPP, iya madahka semina ungkup parti komponen BN aja baka PBB, PRS, SPDP enggau SUPP.
“Ukai, ukai, ukai..aum nya semina ungkup BN aja.
“TERAS enggau UPP, aum deka diatur kediri laban kitai agi ngiga pengari ke ulih menang lalu Kepala Menteri agi nguji ngiga jalai mutarka pekara tu enggau mujur tauka nadai penyarut (entara parti) sereta ke bukai.
“Kebuah pia, laban kitai enda tau enda menang ba semua sitak nya ti ulih meri mandat ngagai Kepala Menteri baru kitai terus nyadi ketuai ngiring menua tu awakka ulih berandau sereta berunding enggau perintah besai bekaul enggau pekara ti patut dipenggi ngagai Sarawak,” ku iya seraya madah awakka terus releven nuju nyadi menua maju taun 2020 enggau 2030.
Kelimpah ari nya Dr. Rundi lebuh ditanya baru bekaul enggau sitak DUN baru sekalika PBB diagihka minimum sitak baru nya, lalu DUN baru Bukit Semuja entara ari seiti sitak ungkup PBB, iya madah;
“Pekara tu agi diperunding, dipelaba engka PBB deka bulih minimum iya nya lima (5) sitak DUN baru.
“DUN baru Bukit Semuja enggau 11 ke bukai, aku arap bendar semua bisi pengerindu ngagai Bukit Semuja laban nya sitak ti selamat (ulih menang), lalu kitai nemu nya majaoriti bansa Bidayuh lalu udah tentu pengari mega ari bansa Bidayuh.
“Tang naka ke diatu sapa bagi parti ke ngempu sitak nya (11 sitak DUN baru), semua bepanggai ba pemutus ketuai BN,” ku iya.
Dalam licha, Dr. Rundi lebuh ke ngenang pasal 11 sitak DUN baru nya madahka nya nyengkaum empat iti sitak baru majoriti diuan bansa Melanau, Iban (dua), China (1), Bidayuh (2) eng- gau dua sitak baru diuan Orang Ulu.
Kelimpah ari nya, dalam licha ke sama iya mega ngelalau rayat mayuh ngambika meri sukung ngagai chalun ti udah dipadahka Kepala Menteri, Datuk Patinggi Tan Sri Adenan Satem.
“Kitai patut anang kakang ati ngagai sida ti udah dipadahka nyadi chalun, kitai patut meri sukung penuh ngagai sida nyengkaum dalam kandang menua Bidayuh ke udah dipadahka Kepala Menteri,” ku iya.
Berebak enggau tu mega iya madahka raban nembiak iya nya orang ti pemadu beguna dalam pemansang sereta politik menua.
Nya alai ku iya, bala raban nembiak patut landik nyarap penerang ti dikerembaika nengah media sosial sereta landik bejalaika tanggunpengawa ngena pengelandik diri enggau pemansang dunya moden.