Adenan: Beri aku lima taun agi ngemansangka Sarawak
MIRI: Kepala Menteri Datuk Patinggi Tan Sri Adenan Satem minta rayat nyukung iya lima taun agi laban iya udah ngamatka ngemansangka Sarawak, lalu iya minta rayat nyadi saksi ba pemujur pekara nya.
“Aku ukai gila kuasa lalu aku ukai minta 33 taun dikena mandangka pengulih aku, semina lima taun aja dipinta ngambika aku ulih gawaka rayat awakka utai ti dikedeka enggau pinta kita ulih diberi sekumbang nya ila,” ku Adenan lebuh ti meri jaku pengelalu ba program Sejiwa Senada ti diatur ba Padang MCC Miri kemari.
Ngemujurka projek Jalai Besai Pan Borneo nya siti ari 45 pekara ti di semaya, seraya Adenan madahka Sarawak udah kelalu lama nganti pemansang ketegal enda benasit sereta enda dikeibuhka.
“Sarawak udah nganti Jalai Besai Pan Borneo ti manah sereta likun pengelama 50 taun lalu aku enggai nganti 50 taun agi, ke alai rayat ulih meda enggau mata sida empu enti datai ba maya ti patut.”
Sepenyauh 1,089 KM ari Telok Melano enggau Merapok, iya madahka jalai besai baru nya ukai semina nyendiaka pengelantang ngagai semua penguna di serata Sarawak, tang mega disadang deka muka mayuh peluang ekonomi ngagai peranak menua tu.
Berebak enggau nya, Adenan madahka pemansang deka dikemerat dipejalaika di menua pesisir ngambi ulih ngedutka seraka enggau kandang nengeri.
“Ukai mudah deka ngaku endang sigi amat agi mayuh orang seranta di menua pesisir lalu mayuh agi orang kaya di mengeri. Dikena ngerapitka seraka nya, RM500 milion ungkup belanja deka dikena ngemansangka projek di menua pesisir ngambi ulih ngenyemakka seraka ba kededua kandang endur nya,” ku iya.
Adenan mega besaumka 45 iti pekara enggau atur ti udah dikategorika iya ari baruh 13 iti kategori nyengkaum Anak Sarawak, Nginsil tauka Ngurangka Bayar, Semaya Perintah Sentang Sekula Peribit China (UEC), Komitmen Petronas, Transformasyen Menua Pesisir; Nadai Ukai Parti Politik Sarawak, Penegap Polisi Perintah, Ngatur sereta Neritaka Adat Ba Pekara Kampung, Pengelikun Nengeri Sarawak, Pelajar Teknikal, Jalai Besai Pan Borneo Sarawak, Pengajar di Sarawak enggau Tanah di Sarawak.
“Kita tau meda enggau silik ba surat padah ti disadung ba bansal pemandang lalu tentuka kita naruh nya ngambika bisi endur kita ngulihka penerang dudi ila.”
Nangkanka nya, Adenan disempulang bini iya Datuk Patinggi Datuk Jamilah Anu enggau Menijar Besai Petronas Bagi Opis Sarawak Shamsur Taha enggau bala menteri bukai nyuaka chunto chek ngagai 25 buah Gerempung Ukai Dikuasa Perintah ( NGO) di Miri, Bintulu enggau Lawas ke alai semua penyampau nya bisi RM470,000. Belanja nya sebagi ari program tanggungpengawa rama korperat (CSR) petronas.
Program Sejiwa Senada ti diatur di Miri nya keterubah endar diatur di serata nengeri tu. Nangkanka nya, prgoram ti sebaka deka diatur di Sibu.