Tumbuhka RT ba tetiap genturung berumah
KUCHING: Ketuai Kunsil Opis Pelilih Menua Samarahan Dato Peter Minos meransang tetiap genturung berumah dalam kandang endur nya numbuhka rukun tetangga ( RT).
Ku iya, RT ulih nyaup nentuka pendiau di tetiap genturung berumah likun ari mayuh bengkah sukut.
“Kelimpah ari nya, raban komiti dalam RT mega ulih ngenataika sebarang penanggul ke bisi ditapi ngagai opis residen tauka kunsil.
“Nengah chara tu pemaik tetiap genturung berumah ulih diintu enggau manah,” ku iya.
Minos mansutka jaku tu rambau ngulu Latih Nyeliah Penusah Angus ke diatur di I- Mas Village Apartment di Kota Samarahan ditu, kemari.
Ngenang kaul bukai, Minos ngarap raban polis ti ngintu pemaik enggau pengelikun Pelilih Samarahan ulih ditambah.
Ketegal pemansang ke balat nyadi di pelilih nya, Minos pechaya atur nambah penyampau raban polis seiti pengawa ti berat.
“Genturung berumah majak nambah lalu enggau nya kitai begunaka mayuh agi raban polis ke ulih nyaup nentuka pengelikun kandang endur,” ku iya.
Latih nyeliah penusah angus kemari dikemujur raban ari Opis Bomba ke alai sida bisi mandangka chara nguna perengka madamka api.
Minos mega ngarap Opis Bomba ulih nyendia sebuah agi bilun engekabang Bomba di Kuching.
Naka ke diatu ku iya, bilun nya semina bisi disedia di Miri lalu begunaka timpuh dua jam enti terebai ari Miri ke Kuching.
Bela datai Chairman IMas Village Apartment, Hartini Mahidin enggau orang bukai.