Album Sada Pengadang Vol 2 udah belabuh dijual diatu
KUCHING: Kompeni OCH Sound Production sekali agi mujur ngeluarka sebuah album lagu puji enggau sembah Iban ke dikumbai Sada Pengadang Vol 2 kena 21 Disember 2015.
Nitih penerang seiku ari penanyi dalam album tu, Empina Baki madahka rega VCD tu iya nya RM25.00 seiti.
“Taja pia album tu nadai disadung ba dedini kedai tauka pasar tang mensia mayuh ke deka meli album tu ulih betelefon terus nuju raban penanyi tu empu,” ku iya madah nengah penerang ke dianjung nuju Berita Iban.
Entara raban penanyi tu iya nya Empina Baki peranak asal Kampung Semawang, Kota Samarahan, Jimbun Rang- kong peranak Skim Skrang, Sri Aman enggau Yorick Lee peranak menua Kerepok, Lingga.
Tiga iku penanyi ke endang udah dikelala sama kala ngemujurka Album Sada Pengadang Vol 1 sebedau tu lalu diatu sida sekali agi begulai nyadaka lagu dalam album ti kedua tu.
Nangkan nya, ku Empina album Sada Pengadang Vol 2 tu ngundan lapan buah lagu ke diberi nama Angkat Pulai Ngagai Tuhan, Alpha enggau Omega, Jesus Mih Pangan Aku, Pemulia Nuan, Rajah Atas Semua Rajah, Nuan Mih Mata Ai Aku, Jesus Nuan Sanggup enggau Tuhan Pengibun Aku.
Mensia mayuh ke deka meli album tu ulih betelefon nuju Empina ba lumur 0198488543, kelebih agi raban peminat lagu puji sembah Iban ke diau besemak enggau menua Kuching, Kota Samarahan, Sri Aman enggau Semananjung Malaysia.
Ngagai bala pemeli ti diau besemak enggau menua Betong, Sarikei enggau Sabah sida ulih betelefon terus nuju Jimbun (014-5945421), kelimpah nuju Yorick (0138037095) ungkup pemeli ke diau besemak enggau menua Sibu, Kapit, Mukah, Bintulu enggau Miri.