Jamit limpang ngabas pemujur sekeda projek di Jalai Suhaili

KAPIT: Sekretari Politik Kepala Menteri Sarawak, Jefferson Jamit Unyat disempulangka Injinir Bagi Menua Kapit, Gerald George, Pemesai Opis Pekara Khas (JASA), Matan Yok, Chairman Komiti Pemansang enggau Pengelikun Genturung Pendiau (JKKK) Kampung Baru, Jalan Suhaili enggau Pengulu Haji Abang Hamzah Bolhassan bisi limpang ngabas sekeda projek pemansang mit menua pesisir di tumpuk pendiau sepemanjai Jalai Suhaili ditu.

Naka diatu, pengawa dipejalaika raban kunteriktor nyauka tembu iya nya ngaga pengadang di nebing sungai dikena nyeliah ari penusah tanah tusur tauka tanah tekerap ke tau ngeruga pengelikun mensia mayuh ke nengah Jalai Suhaili.

Tanah tekerap bisi nyadi dalam pun bulan Disember nyin tadi rambau musim pengujan.

Penanggul bukai ke nyadi pangka ari penyadi tanah tekerap tu iya nya paip pechah.

Dulu agi ari nya, piak kunteriktor udah diasuh bejalaika pengawa ngemanahka batang paip nya.

Taja pia, pengudah pengawa ngemanahka paip nya tembu, raban kunteriktor enda ulih ngemanahka baru jalai nya baka ke asal.

Beduduk ari nya, gaya jalai ti ditinggal nya tau amat ngeruga pengelikun penguna jalai alun kelebih agi sida ke bekenaka motosikal.

Pekara tu ngasuh raban penguna jalai alun ringat lalu nuduh piak Opis Bekal Ai Menua Pesisir enda mujur ngemanahka jalai nya.

Sida minta piak opis nya bejalaika pengawa enggau menyana agi dikena nyaga pengelikun penguna jalai alun.

NGABAS PROJEK: Jamit (dua kiba) begulai enggau Zulaini Junaidi (kiba) sereta raban ke bukai benung meresa jalai ke bisi rusak ketegal pengawa raban kunteriktor ngemanahka batang paip ke pechah.