PBB Tanjong Datu deka numbuhka dua pating baru dikena napi PRN

LUNDU: Parti Pesaka Bumiputera Bersatu (PBB) Pampang N3 Tanjong Datu udah sedia napi Pengawa Bepilih Kunsil Nengeri (PRN) ke dipelaba deka diatur kena bulan March tu ila.

Dikena ngenegapka raban parti nya, Sekretari Pampang, Kr. Abdul Razak minta dua bengkah agi Pating PBB N3 ditumbuhka.

Ku iya, dua pating tu iya nya Kampung Gerunggang enggau Kampung Sungai Langir/ Selenggok.

Kenu ku Abdul Razak, penumbuh nya deka nambahka penyampau pating ke bisi diatu di sitak Tanjong Datu ke manggai 35 buah ranting.

“Pating kitai majak nambah lalu kitai pechaya penambah tu deka ngenegapka agi raban parti napi PRN,” ku iya.

Abdul Razak mantaika jaku nya rambau Aum Kaban Komiti PBB Pampang N3 Tanjong Datu, ditu ensana.

Aum nya udah dichairmanka Sapit Ketuai Pampang PBB N3 Tanjong Datu, Kr. Abu Seman Bin Karim.

Sekeda ke bisi datai ngulu aum tu iya nya Sekretari Politik Kepala Menteri Sarawak, Halmi Hazmi sereta kaban komiti besai pampang.

Kenu ku Abdul Razak, tuju aum nya diatur dikena merambu pengawa dikena nyikap kaban PBB N3 Tanjong Datu napi PRN.

Sekeda ari agenda aum iya nya nyiri portfolio ungkup kaban PBB N3 Tanjong Datu napi PRN11.

Aum nya udah milih Halmi Hazmi mangku pengawa nyadi Direktor Operasyen, Abu Seman nyadi Sapit Direktor Operasyen, Abdul Razak nyadi Direktor Bilik Gerakan.

Bela bisi diputuska dalam aum tu nya iya nya portfolio ketuai penyambung, ketuai penyelaras program, ketuai perengka pengangkut, sereta sekeda portfolio ke bukai.

Ku Abdul Razak nambah, aum nya mega nyirika Ketuai Indu Opis Pelilih Ngundi, Ejen Ngundi sereta Ngira Undi ba tetiap Pelilih Ngundi di Sitak Kunsil (DUN) nya.