BN Sarawak dikearapka ulih menang urung 70 penuduk DUN maya PRN ila
SERIAN: Barisan Nasional (BN) Sarawak dikearapka ulih menang urung 65 ngagai 70 penuduk sitak Kunsil Nengeri (DUN) ba Pengawa Bepilih Nengeri (PRN) ke deka datai, ngambika mayuh agi peminta ari nengeri tu ulih didinga perintah besai.
Menteri Pemansang Infrastruktur enggau Penyambung, Dato Sri Michael Manyin Jawong madahka, nya alai rayat nengeri tu patut meri sukung tauka mandat ngagai BN ti diketuaika Kepala Menteri Datuk Patinggi Tan Sri Adenan Satem menang ba PRN tu ila.
Ku iya, enti Kepala Menteri bediri enda ngira dini sitak iya endang ulih menang tang iya semina ulih bediri minta pilih ba seiti sitak aja lalu enti iya aja menang iya mega enda ulih nyadi Kepala Menteri.
“Nya alai, ba PRN ke deka datai tu kitai BN patut menang ba urung 65 ngagai 70 sitak DUN ngambika peminta Kepala Menteri ungkup nengeri Sarawak didinga sereta ulih diperundingka di Putrajaya.
“Enti kitai menang majoriti (65 ngagai 70 sitak DUN) kitai deka ulih terus mansang, sama ngasaika pemansang lalu ukai meratika orang aja.
“Maya PRN enti kitai nyukung penyakal kitai deka terus tinggal dibelakang tang enti nyukung BN dalam timpuh 15 taun agi kitai deka terus maju,” ku iya.
Manyin mansutka pekara nya lebuh bejadika Perhimpunan Belia Tebedu 2016 Seminar Semangat Belia ti diatur Pergerakan Pemuda & Wanita Pari Pesaka Bumiputera Bersatu (PBB) Pampang DUN N.21 Tebedu ba Dewan Tayung Langui, Kpg Pichin ditu, kemari.
Bejaku baru iya madahka, meri sukung ngagai BN amat beguna ngambika pemansang lebih agi pemansang menua pesisir ulih chakah dipe- jalaika.
Ambika banding ku iya, di menua pesisir di nengeri tu agi bedau mayuh ke tinggal ari arus pemansang jalai alun enggau kebukai, ti semina ulih dipejalaika perintah BN.
“Baka aku ti megai tanggungpengawa ngaga jalai alun sereta jematan di serata nengeri Sarawak.
“Naka ke diatu kitai agi patut ngaga 5,000 kilometer jalai alun di serata nengeri Sarawak lebih agi di menua pesisir laban jalai tu ti nyambungka tetiap genturung pendiau tauka rumah panjai.
“Nya kebuah kitai patut meri mandat ngagai Kepala Menteri menang ba PRN tu ila, laban kitai agi begunaka pemansang sereta ungkup belanja besai baka dikena ngaga jalai alun pemanjai 5,000 kilometer dikena nyambungka enggau menua pesisir kitai begunaka RM25 billion lalu dikena ngaga jematan kitai begunaka RM10 billion agi,” ku iya.
Kelimpah ari nya, Kaban Kunsil Nengeri ( ADUN) Tebedu ti mega chalun sitak nya minta raban bansa Bidayuh terus beserakup awakka enda tinggal ari bansa bukai.
“Kitai ngarapka raban bansa kitai Bidayuh enda ngira sekalika ari Serian, Bau tauka bukai, kitai ulih terus beserakup ngambika kitai bansa minoriti enda tinggal ari bansa bukai sereta beratka kualiti,” ku iya
Urung 600 iku raban nembiak ari DUN Tebedu, Kedup enggau Bukit Semuja datai ngulu Gempuru Nembiak Tebedu 2016, kemari.
Sama bisi datai ngagai pengemai nya kemari Menteri Muda Perengka Guna Mensia Mayuh Datuk Dr. Stephen Rundi, ADUN Tarat ti mega Sapit Speaker Kunsil Nengeri Datuk Roland Sagah, ADUN Kedup Martin Ben enggau kebukai.