BN dikeandal ulih menang ba sitak DUN Bukit Goram

KAPIT: Barisan Nasional (BN) dikeandal ulih menang ba penuduk baru iya nya di Kunsil Nengeri ( DUN) Bukit Goram maya Pengawa Bepilih Nengeri (PRN) tu ngambika ulih nyadi pengemun pemansang ungkup rayat dia.

Sekretari Politik Kepala Menteri, Jefferson Jamit Unyat madah, taja empai ditemu bagi parti ti ngarika BN bediri dia tang enti BN menang, pemujur nya deka ngerandang mayuh agi awak dikena numbuhka pemansang.

“Kelimpah ari nya, kenyau DUN Pelagus dipegai penyakal, rayat dia mayuh bendar sebana ketegal ti tinggal pemansang dalam kandang lima taun.

“Nya alai, udah datai maya iya kitai begempung nentuka penuduk ba DUN Bukit Goram enggau DUN Pelagus diempu BN,” pia ku iya madah.

Iya mantaika jaku tu maya nemuai ngagai Rumah John Jamba, Sungai Sesibau ditu, empai lama tu tadi.

Program nya diatur Parti Pesaka Bumiputera Bersatu (PBB) Pelagus.

Jamit madah, program nya diatur sida dikena sida besemak agi enggau rayat kelimpah seiti ari chara ‘ngerak’ rayat ngambika nemu PRN deka diatur enda lama agi.

“Penyakal deka belabuh datai niki rumah kita lalu nyadung penemu politik sida.

“Aku pechaya rayat ditu landik mida bagi penemu enggau pengawa ke betul ngambika kita enda telabuh pechaya ke danji balang.

“Sida mega deka chakah madah kediri ransing ngemeratka pemansang menua pesisir.

“Jaku sida nya bula laban maya Aum Kunsil Nengeri tu tadi nadai seiku ari sida nyukung penemu Kepala Menteri ti deka ngungkupka ungkus RM500 juta dikena ngaduka pemansang menua pesisir,” ku iya madahka baru.

Berindik ari pekara tu, Jamit minta rayat baikka di DUN Pelagus tauka Bukit Goram bela nyukung pegai perintah BN ngambika Datuk Patinggi Tan Sri Adenan Satem mengkang nyadi Kepala Menteri.

“Adenan seiku pemesai ti balat ngemeratka pengidup rayat.

“Nadai pengerugi kitai nyukung iya nandu pengawa nyadi Kepala Menteri baru,” pia ku iya.

Bela bisi datai maya tu iya nya Pemesai Opis Pekara Khas (JASA) Kapit Mohd Matan Yok, Pemesai JASA Pelagus Kanchin Manggom, Pemesai Opis Pemadah Kapit Garai Entili, Ketuai Raban Nembiak PBB Baleh Layang Temenggong James Jimbun, Ketuai Raban Nembiak PBB Pelagus Judson Jarrau enggau bala ke bukai.