Penerang dipansutka Chong nyau baka ngajum ketuai belaya

KUCHING: Barisan Nasional ( BN) Sarawak ngembuan penau nentuka pemenang nengah chara diri empu, pia ku Sekretari Jeneral BN Sarawak, Datuk Dr Stephen Rundi Utom.

Iya mantaika jaku nya nimbal jaku ti bisi dipansutka Chairman Parti Tindakan Demokratik (DAP) Chong Chieng Jen apin lama ke udah ti madahka BN Sarawak dipelabaka deka teulihka mayuh agi pemujur ba penuduk sitak mengeri enti sema Menteri Besai ngemaduka diri mangku pengawa nya.

“Jaku dipansutka Chong baka ke ngajum tauka ngadaka pengeringat ati antara raban ketuai nengeri tu enggau perintah besai bejulukka politik kelebih agi nyerumba Pengawa Bepilih Kunsil Nengeri ( PRN) ke majak sempil.

“Ambika penerang, kami bisi penau nentuka pemenang ungkup diri nengah jalai sereta chara diiring Kepala Menteri empu,” pia ku iya madah ngagai Utusan Borneo ditu kemari.

Dr Rundi madahka raban pemesai di nengeri tu lebih agi nemu sereta meretika rayat Sarawak enti dibanding enggau rayat ari luar Sarawak.

Dulu agi ari tu, Chong nengah sebengkah penerang, madahka diri pechaya penyampau undi BN ba penuduk mengeri deka nambah enti sema raban ketuai bejalaika pengawa nya.

Chong ke mega nyadi Kaban Parlimen (MP) Bandar Kuching mansutka jaku nya nimbal jaku dipansutka Dr Rundi sebedau tu iya ke madahka BN Sarawak ngembuan peluang menang manah agi ba penuduk mengeri enti sema Parti Sa’ati Rayat Sarawak (SUPP) enggau UPP bekerejasama.

Rambau PRN- 10 taun 2011 suba, BN Sarawak menang 55 penuduk lalu DAP menang 12 penuduk, Parti Keadilan Rakyat (PKR) – tiga penuduk, sereta Bibas (seiti penuduk).

Pemutus tu nyata nunjukka BN lenyau lapan penuduk enti dibanding 63 iya ke dimenang sida rambau PRN 2006.

Tambah mega, DAP mujur nambahka enam ngagai 12 penuduk seraya PKR nambah seiti penuduk; nyadi tiga penuduk. Pemutus tu mega ngayanka DAP enggau PKR nyapu beresi semua lima penuduk di Kuching.

Iya nya DUN Padungan ( DAP), Pending ( DAP), Batu Lintang (PKR), Kota Sentosa (DAP) sereta Batu Kawa (DAP).