Parti dalam BN Plus mega disengkaum Barisan Nasional Nengeri, ku Nansian

BAU: Sapit Presiden Parti Tenaga Rakyat Sarawak (TERAS) Datuk Peter Nansian minta semua parti dalam serakup Barisan Nasional (BN) Nengeri begempung ngelaban keruga parti penyakal.

Netapka TERAS sebengkah parti dalam BN PLUS ke mega dalam serakup BN Nengeri, iya madah parti dalam serakup nya patut enda ngembuan bida runding sama diri.

“Nadai kebuah kitai ngembuan runding ke bebida ketegal Kepala Menteri enggau Menteri Besai udah setujuka parti dalam BN PLUS endang dalam serakup BN.

“Munsuh kitai ke bendar iya nya parti penyakal baka ke DAP, PKR, PAS enggau parti ke ari Semenanjung Malaysia,’ku iya lebuh dikerandau pemberita ba pengerami Ketuai Begulai enggau Rayat di Kampung Senibong, Bau kemari.

Nansian ke mega Menteri Muda Pemansang Komuniti enggau Industri nambah parti dalam serakup BN patut nyukung sebarang aja chalun ke udah dipilih ngarika BN ba pengawa bepilih tu ila.

“Sukung nya deka nentuka chalun BN ulih menang ngambi kitai ulih meri servis ke pemadu manah ungkup rayat, mai pemansang kelebih agi ngagai menua pesisir,’ku iya.

Ngenang sentang aum raban ketuai BN ti deka ngerandau rintai chalun enggau agih penuduk ba 11 sitak baru, Nansian ke nyadi Kaban Kunsil Nengeri ( ADUN) Tasik Biru pechaya TERAS deka disengkaum ba aum nya.

Ensanus, Sekretari Besai BN Nengeri Datuk Dr Stephen Rundi bisi madah, Komiti Renggat Tinggi BN deka ngatur aum ngerandau kededua pekara nya dalam awak ke semak tu.

Ba pengerami ke diatur di Serian, Rundi madah aum nya deka matak semua parti dalam serakup BN iya nya Parti Pesaka Bumiputera Bersatu (PBB), Parti Rakyat Sarawak (PRS), Parti Se’Ati Rakyat Sarawak ( SUPP) enggau Parti Progresif Demokratik Sarawak (SPDP).

Ungkup TERAS enggau Parti Rakyat Bersatu (UPP), Rundi netap kededua parti nya deka dibai berandau kediri.