Ruang bilik ke nguan genturung pendiau Tasik Biru ngarapka bisi lekterik taun tu
BAU: Peranak menua ke nguan genturung pendiau Tasik Biru ditu, ngarapka perintah meri geran baka ke dipinta ngambika rumah sida ulih disambung ngena kuasa karan taun tu.
Taja pan rumah sida semina lima minit nepan kereta ari Pasar Bau, tang sida dia nadai ngasaika bekal kuasa karan 24 jam taja pan udah lama diau mendam dia kenyau sebedau penumbuh Malaysia.
Chairman Komiti Pemansang enggau Pengelikun Genturung Pendiau (JKKK) Ajit Francis madah, bisi 35 pintu rumah di tumpuk pendiau nya nadai bekal kuasa karan.
Iya mega madah, urung 40 pintu rumah ke bukai ngelingi tumpuk pendiau nya mega nadai bekal kuasa karan taja pan sida besemak enggau Pasar Bau.
Pia mega ku iya, taja bisi tiang enggau tali karan udah disambung ngagai tumpuk pendiau nya, tang apin bisi bekal kuasa karan grid disambung lalu tu mai penanggul belanja ba ruang bilik bekenaka genset beguna belanja ke mar, ngulihka bekal kuasa karan ngagai rumah sida.
¡°Tu peminta kami ungkup Taun Baru tu, ngarapka ulih ngasaika bekal kuasa karan. Tiang udah ga didiri, lalu tali karan mega udah lama dipasang, tang kami bedau kala ngasaika bekal kuasa karan,” ku iya rambau pengerami gempuru Hari Krismas enggau Taun Baru di balai tumpuk pendiau nya apin lama ke udah.
Pengerami lemai nya dipenyadika Ketuai Pemesai Esekutif Putra Sentosa Group of Companies, Dato Henry Harry Jinep, disempulang Sapit Ketuai Orang Indu Parti Demokratik Progresif Sarawak ( SPDP) Theresa Udam, Ketuai SPDP Tasik Biru, Michael Siten.
Iya mega madah, peranak tumpuk pendiau nya peturun asal aki ini sida ke dulu berimbaka menua di Bau menya.
Sida netapka diri diau mendam ba menua nya ari ke mulaika diri ngagai menua asal sida di entigis, ku iya nambah
¡° Nyentuk sehari tu, tumpuk pendiau nya apin digazetted. Kami udah nganjung peminta ngagai Opis Tanah enggau Servei ngambika pala tanah dikeluar laban kami ngasaika diri endang bisi hak nerima surat pala tanah nya ti tau mai penguntung ngagai kami,” ku iya.
Iya mega ngarapka, raban temuai dipebasa dikangau ngulu pengerami nya kelebih agi Henry sereta raban ketuai SPDP ulih mai pekara nya ngagai piak ke tinggi agi