Seraban 56 iku nembiak SK Taba Sait nerima kereban sekula ari Naim Group
KUCHING: Kompeni Naim Group, sebengkah raban pemaju enggau kunteriktor di Malaysia, mai pengaga Hari Krismas ngagai raban nembiak di Sekula Primari (SK) Taba Sait ba Skim Pengentap Pendiau Baru Bengoh ( BRS) pengudah nyuaka pemeri beg enggau perengka dikena belajar ngagai nembiak sekula dia.
Sepenyampau 56 iku nembiak sekula bisi nerima pemeri nya maya atur pengawa nyuaka pemeri di sekula nya apin lama ke udah.
Menijar Besai Naim, Hasmiah Anthony Hasbi, madah, pemeri nya sebagi ari inisiatif tanggungpengawa rama korporat (CRS) Genap 20 Taun penumbuh kompeni nya.
“Sebagi ari pengawa dikena ngintu pengerami nya, kami ngatur Karnival Hari Krismas Genap Taun Naim lalu sebengkah ari kunchi aktiviti iya nya pengawa nya- dung pemeri ‘Project X’mas Cheers’. Di baruh pengawa nyadung pemeri tu, kami ngapil ngagai semua staf enggau mensia mayuh ngambika bela meri sekeda barang,” ku iya nambah.
Hamsiah nandu, piak Naim seruran ngemeratka peminta raban komuniti alai bebendar beoperasyen nambahka pemanah tikas pengidup raban komuniti nya.
“BRS tu bisi pengelui laban iya ukai semina ungkup pemanah rampa pemesai genturung rumah tang mega dalam bidang skim inisiatif CSR Naim nya empu,” ku iya nerang.
Dikena nentuka gaya pengidup raban komuniti manah agi, piak Naim udah ngaga empat buah balai komuniti; sebuah ungkup seiti genturung pendiau, sebuah gerija Angikan enggau Sidang Injil Borneo A(SIB) udah didirika sereta dua buah kuarters endur diau ungkup bala paderi iya nya sebagi ari program ungkup komuniti.
“Tambah mega, kami bisi meri opis BRS ngagai Opis Pelajar Sarawak (JPN) dalam taun 2013 nyadi sekula, iya nya SK Taba Sait, ungkup bala anak ke diau di BRS,” ku iya.
Kami berasai gaga endar ati diberi peluang mantu raban komuniti BRS sereta kami ngarapka sida teulihka pemujur jemah ila,” ku Hasmiah.
Kepala Pengajar (GB) SK Taba Sait, Jameson Simod mantaika pengaga ati iya laban piak Naim udah bebendar deka ngaul sereta mantu sekula nya.
“Kami meri besai terima kasih ngagai Naim ketegal pemanah budi sida. Raban nembiak kami udah diperansang ngambika belajar bebendar ngujungka sekula kami teulihka sebagi ari tiga buah sekula ke pemadu manah di Sarawak dalam pemutus peresa UPSR 2015 tu tadi,” ku iya.