Rayat menua pesisir patut meri awak ngagai Adenan terus ngiring nengeri tu
KUCHING: Rayat kelebih agi di menua pesisir dipinta meri awak lima taun agi ngagai Kepala Menteri Datuk Patinggi Tan Sri Adenan Satem terus ngiring nengeri tu.
Kaban Kunsil Nengeri (ADUN) Engkilili Dr Johnical Rayong Ngipa madah, atur pengawa ke dipejalaika Adenan sekumbang ngiring nengeri tu chukup manah sereta dipuji baka bakih iya enggau penyakal.
“Nya alai, endang rugi amat nyema iya badu naka dua bulan tu laban kitai di menua pesisir agi tubah begunaka saup ari iya dalam ngaduka pemansang udah tu,” ku iya.
Iya madah munyi nya rambau Program Nyuaka Chek MRP enggau ‘ walkabout’ di Rumah Kudang Juyok, Berenggang di Lubok Antu kemari.
Kenu ku iya, ukai deka ngemesaika Adenan tang pengawa ke udah digaga iya endang ngasuh temegah taja bedau kelalu lama ngiring nengeri tu, kelebih agi pengawa nya bekaul enggau rayat di menua pesisir.
“Chunto iya nurunka rega elektrik, madamka bayar tol, nyiri tanah NCR, ngemeratka kuasa autonomi pelajar kelimpah ngasuh bayar tambang feri semina RM1 enggau mayuh agi ke bukai,” ku iya.
Dr Rayong ngarapka rayat enda ngayahka undi sida ngundi raban penyakal maya PRN tu ila.
“Nyema kita deka meda nengeri tu mansang, nyadi chalun ke patut dipilih kita iya nya endang pengari BN,” ku iya.
“Enda ibuh mendingka penemu penyakal laban sida endang landik bejaku dikena ngulihka sukung ari kita,” ku iya.
Ngenang pasal pemansang di konstituensi Engkilili, iya nyemetak madah deka ngereja pengawa nya enggau naka ulih.
“Chunto iya pasal penanggul Projek Kuasa Karan Menua Pesisir (BELB), udah aku padah ngagai piak ke bekaul lalu nganti disambung karan nyema pengawa nyambung wayar enggau ngentak tiang tembu.
“Pia mega jalai raya udah mayuh endur ngelawa rumah panjai, kelimpah ari ai beresi ke benung digaga,” ku iya seraya minta rayat terus meri pengarap ngagai iya ngetanka DUN tu maya PRN ila.
“Nadai utai dikelalai pasal aku ke deka ngetanka DUN tu ngarika BN...nadai kebuah kita nangi nitihka aku meri mandat ngagai Adenan ke mega nyadi Kepala Menteri kitai udah tu,” ku iya.
Berebak enggau nya, Tuai Rumah Kudang Juyok ke ngarika sida serumah madah sida endang nyukung Dr Rayong bediri di DUN tu ila.
“Kami agi randaka pemansang lalu ngarapka Dr Rayong ulih terus meri pemansang ngagai rumah panjai tu.
“Nya alai, aku ngarapka bala pengundi ba rumah panjai tu ulih terus nyukung iya (Dr Rayong) maya PRN ila... iya seiku orang ke mentas, bagas gawa sereta siruka rayat... orang baka tu mih patut nyadi pengari rayat sereta patut dalam kabinet udah tu ila,” ku iya.
Berebak enggau nya, Dr Rayong nyuaka geran MRP RM5,000 ngagai Komiti Pemansang enggau Pengelikun Genturung Pendiau (JKKK) Rumah Kudang Juyok sereta ngemendarka bantu kipas berega RM4,000 lalu penyampau semua iya RM9,000.
Sama bisi datai Pengulu Inchang Ancheh, bala kaunselor enggau bala tuai rumah.