Pakatan Harapan udah sedia nyatup Barisan Nasional ungkup PRN tu
KUCHING: Pakatan Harapan (PH) di Sarawak nyukung sempekat ti udah disain raban ketuai PH di renggat nasional apin lama ke udah lalu nya mandangka PH besedia nyadi sebengkah gempung ke tegap maya Pengawa Bepilih Besai Menua (PRU14) tauka Pengawa Bepilih Besai Nengeri Sarawak (PRN 11) ke enda lama agi.
Chairman Parti Keadilan Rakyat (PKR) Sarawak Baru Bian madah ba pengawa nyain sempekat kemari diatur di Kuala Lumpur, Parti Tindakan Demokratik (DAP) enggau PKR nyain sempekat bekerejasama enggau Parti Amanah Rakyat (Amanah) betapi enggau pengawa bepilih ti deka datai tu ila, nyain sempekat nya bela disetuju semua.
Taja pia, Pakatan Harapan (DAP, PKR enggau Amanah) bedau mutuska enti sekalika sida deka bekerejasama enggau Parti Islam Se-Malaysia (PAS).
“Sempekat nya disetuju ulih semua pengari ba renggat nasional. Enti nitihka prinsipal, pelaba aku, sempekat nya manah laban mandangka kami tu sebuah parti, sereta gempung ke seati.
“Ba aku, tu danji ke manah, lalu nambah enggau nya, iya ulih mantu gempung parti duduk baum lalu bejuraika sekeda pekara, baik nya polisi, penuduk, tauka pekara bukai,” ku Baru.
Iya madah munyi nya lebuh dikerandau pengudah bejadi- ka pengawa Makai Tengahari Hari Krismas enggau Taun Baru ti diatur ungkup orang buta di The Blind Centre di Jalai Ong Tiang Swee ditu, kemari.
Iya nandu baru, politik diatu nadai pilih bukai tauka alternatif ke penyakal begempung kelebih agi lebuh deka napi Pengawa Bepilih Besai (Parlimen) GE14.
“Nya ke berat agi...Laban rayat malik ngagai penyakal ke tau nyadi alternatif ari Barisan Nasional (BN).
“Nya alai, ba pengawa PH nyain sempekat nya endang manah laban iya ulih mantu PH di Sarawak, lalu danji nya nyadi atur ke ulih dikena PH,” ku iya.
Kelimpah ari nya, iya madah danji ti disain nya mega balat disukung PKR laban tuju ari pemun, penuduk PKR begempung enggau PH (suba nama sida iya dikumbai Pakatan Rakyat tauka PR) nyengkaum penyakal bukai ngelaban perintah BN.
“Nya alai, ba penemu nya, iya ulih ngempung penyakal di Sarawak nitihka atur ti digaga ketuai renggat nasional.
“Ba penemu aku, kitai enda ibuh ngena jaku madahka kitai (Sarawak tauka Sarawak) tu bebida ari Semenanjung.
“Pekara ke berat, dalam politik, kami enda tau enda besaup enggau renggat nasional.
“Baka kitai ke bejaku pasal hak Sabah enggau Sarawak, danji Sabah enggau Sarawak, ketuai pemesai Pakatan enda tau enda beratika pekara tu lebuh ngaga polisi, ukai baka BN.
“BN ngembuan atur ke nyelai tauka enda sebaka, ambika chunto, Semenanjung lain, Sabah, Sarawak lain,” ku iya.
Iya nandu baru, nyemaka baka pengarap, di Semenanjung atur iya enda sebaka enggau di Sabah enggau Sarawak.
“Kitai enda ulih ngembuan sistem dua iti, dua iti atur undang-undang, dua iti polisi ke Malaysia.
“Nya kebuah ba penemu aku, PH enda tau enda bisi dalam politik Malaysia, laban kami deka mai penemu ke baru, sebaka ungkup semua rayat Malaysia, enda magi rayat Malaysia, sereta kami ngarika semua bansa Malaysia,” ku iya.
Iya nandu baru, politik bansa, pengarap nadai alai tauka penuduk dalam sistem politik Malaysia ke datai ari mayuh macham pupu bansa.
“Gempung dalam PH sama sebaka kelebih agi PH datai ari mayuh macham pupu bansa ari sukut sejarah parti sereta pemungkal parti ke enda sebaka. Dalam penemu tu, kami sebaka dalam politik, polisi sereta ngarika semua rayat Malaysia.
“Ketegal pemansang politik ke enda sebaka nya, nyangka sekeda parti dalam PH mayuh agi muakka sesebengkah bansa. Ambika chunto, DAP muakka China, PKR diarika mayuh pupu bansa bukai sereta Amanah muakka Melayu.
“Tuju kami deka nyapai politik ke tuai runding, sebaka ungkup semua pupu bansa tauka pengarap,” ku Baru.