Lebih 30 atur pengawa mujur dipejalai ba 2015
Ketegal pengangkun, saup sereta kaul semua kaban serakup, juluk muntang agi dijapai
KUCHING: Serakup Dayak Sarawak (PEDAS) Pampang Kuching (PPK) udah ngatur Aum Besai Ninting Taun (AGM) 2015 disempulang Aum Besai Ngenyit (EGM) kena lemai 9 Januari tu tadi ba sebengkah palan aum ditu.
Aum sekali tu bechairmanka Sapit Ketuai Pampang (SKP) Victor Ason lalu aum tu diatur kelai timpuh pangku pengawa 2015 tembu lalu ngemunka tampung pengawa ungkup taun 2016.
Sekeda ari tuju AGM tu iya nya deka nyimpul semua pengawa ti udah disereta, dipejalai sereta dikemujurka raban PPK sepemanjai taun 2015; berengkah ari ditumbuhka nyentuk ujung taun nyin tadi.
Pia mega, ripot ari tiap komiti tinggi baka Komiti Pengawa Rama enggau Pengintu Pengelantang Pendiau, Komiti Pekara Pelajar, Komiti Main Asal enggau Adat Istiadat, Komiti Lumba, Main enggau Rekresyen, Komiti Raban Indu sereta lansa aktiviti PPK dibantaika Sapit Sekretari PPK, Keluton enggau ripot pekara wang dibantaika Tukang Wang PPK, Novert Sullang, lalu semua penerang tadi disimpulka SKP, Victor.
Lebih 30 bengkah aktiviti udah mujur dipejalaika PPK sepemanjai taun 2015 tu nyengkaum pengawa nganjung bantu penusah angus, rabat, rumah rusak dibiau kabut, sereta pengawa meri sukung ba sekeda pechara kes Tanah Adat Bansa Asal (NCR) di Kort Tinggi Kuching, sereta sekeda aktiviti gempuru ruang bilik enggau pengerami begelemu ngedutka kaul enggau pangan
“
Aku ngenataika pengaga ati ketegal diberi pangandal sereta milih aku mangku pengawa nyadi Ketuai Pampang PPK ungkup 2016 tu. Pangku pengawa tu sebengkah tanggungpengawa ke berat lalu aku minta semua kitai dalam serakup tu begempung enggau pangan diri ngambi
” muntang agi nyapai juluk PEDAS. Victor Ason Ketuai PEDAS Kuching
diri enggau aktiviti ke bukai.
Beduduk ari penyampau aktiviti tu nyata ngayanka raban PPK chakah bejalaika pengawa sereta seruran nyikap diri nadai ngira maya besaup mantu raban bansa Dayak ke dituntung penusah nyerumba juluk ati PEDAS selampur nengeri deka neri negi sereta ngangkatka bansa Dayak di menua tu.
Nyerumba AGM sekali tu, PPK mega ngatur EGM ketegal dua pangku pengawa puang pengudah penyandang iya matak/nyurutka diri ari pan- gku pengawa nya. Raban PPK mujur nyapai pemutus nyirika Victor Ason mangku pengawa nyadi Ketuai Pampang ke baru lalu sapit iya, Resa Billie.
Pia mega pangku pengawa Sekretari PPK dipadu ngagai Keluton Ukok, pengudah penyandang iya, Petrus Simon Awan nyurutka diri ketegal bisi komitmen pengawa ke bukai, lalu sapit iya, Ngelambong Chin.
Lina Kunjak diberi basa mangku pengawa nyadi Ketuai Raban Indu PPK ke mega nyadi Ketuai Pemadah enggau Publisiti PPK sereta Stephanie Brooka dipaduka nyadi Sapit Ketuai Raban Indu PPK.
Raban komiti tinggi ke bisi ubah ungkup taun 2016 iya nya Komiti Pengawa Rama enggau Pengintu Pengelantang Pendiau nerima kaban baru, Playmon Raynold sereta disaup Soebiandono, Sireg Tobi enggau Thumas Mergi. Komiti Lumba, Main enggau Rekressyen mega nerima kaban baru, Rentap Salau disempulang Petrus Lagan enggau Geoffery Ganda.
Pia mega ngagai kaban Komiti Main Asal enggau Adat Istiadat nerima kaban baru iya nya Matthew Manggat, Johnson Bilok sereta Nick Nabau kelimpah ari kaban lama, Anthony Ejau. Bagi Komiti Pekara Pelajar, Sunny Pinye udah nerima pangku pengawa disaup John Jambu.
“Aku ngenataika pengaga ati ketegal meri pangandal sereta milih aku mangku pengawa nyadi Ketuai Pampang PPK ungkup 2016 tu. Pangku pengawa tu sebengkah tanggungpengawa ke berat lalu aku minta semua kitai dalam serakup tu begempung enggau pangan diri nyapai juluk PEDAS,” ku Victor.
SKP Resa Billie mega bisi mantaika pengarap iya ngagai penegap penemu kaban serakup tu pia mega bansa Dayak ke bisi dalam PEDAS nentuka juluk PEDAS ulih japai.
“Anang sesekali bisi agenda kediri empu, deka beambi ulih sereta ngira penguntung diri dalam pejuangan PEDAS. Tiga bengkah pekara tu ke tau munuh bansa Dayak,” ku Resa manta.
Bela bisi bekunsika penemu raban AGM/EGM malam nya, Sapit Sekretari, Ngelambong Chin madahka raban PEDAS patut meretika dua leka jaku; beserakup, besaup, enggau lenak agi sereta ngemai jaku tu dalam pejuangan PEDAS.
AGM sekali tu dilanjar ngagai aum ke bukai lalu pengawa malam nya disempulang enggau pengawa makai selamat PPK seraya ngerapatka kaul enggau pangan diri.