Raban pengundi di Pelagus minta Masing milih Stanley bediri baru

SIBU: Seraban pengundi di sitak Kunsil Nengeri (DUN) Pelagus ngansak Presiden Parti Rakyat Sarawak (PRS) Tan Sri James Masing ngambika meri awak baru ngagai Stanley Nyitar nyadi chalun rambau Pengawa Bepilih Kunsil Nengeri (PRN) tu ila.

Stanley sebedau tu kala bediri ngena tiket Barisan Nasional (BN)-PRS ba penuduk DUN Pelagus tang alah rambau PRN 2011.

Orang ke bejaku ngarika raban sida tu, Sylvester Aran Geramong madahka, Masing dikearap enda bechiping ngagai Stanley lalu enda ngirai nama chalun bukai ba penuduk DUN Pelagus ila.

“Kami di Sungai Amang, Pelagus ditu sa’ati deka meda Standley nyadi chalun kami rambau PRN ti deka datai di Pelagus.

“Nya alai, kami minta pemanah budi Masing ngambi berunding ngengkahka Standley ke diatu bisi ati deka bediri baru enti sema iya diberi peluang kedua,” pia ku iya madah ngagai raban pemerita ditu, kemari.

Iya mantaika jaku nya meri sukung ngagai jaku dibantaika Mejar (B) Moses Ripai nengah surat kabar menua tu apin lama ke udah ke mega minta Masing meri awak kedua ngagai Stanley.

Ku iya, Moses nemu agi nama pengawa ke udah digaga Standley laban iya mega nyadi kaling Standley kenyau ari suba.

“Taja Standley alah, Moses tetap nitihka Stanley laban iya pechaya sigi bisi peluang kedua ungkup Standley enti sema Masing ngena ‘strategi’ ke sebaka 2011 alai Kaban Kunsil Nengeri ( ADUN) Ngemah Alexander Vincent dikena baru pengudah iya alah rambau PRN 2006,” ku iya manta baru.

Sylvester madahka, PRS patut enda bechiping enggau Stanley sereta berunding ari bemacham sukut pekara dikena nentuka BN di Pelagus menang lalu ulih ngambi pulai penuduk nya ari penyakal.

“Stanley nya peranak asal Pelagus lalu iya sigi patut nyadi chalun BN-PRS ba penuduk DUN Pelagus. Kami pechaya enti sema presiden parti ngaga pemutus ke manah lalu ngetanka iya, sereta pemutus tu ulih dibantaika nengah pemujur BN di Pelagus rambau PRN tu ila.

“Kebuah pia laban mayuh sida agi rinduka Standley, lebih agi iya diatu udah dikelala sereta iya empu peranak asal Pelagus.

“Nya alai, PRS enda rugi enti sema begunaka Stanley baru nyadi chalun rambau PRN sekali tu,” ku iya nambah baru.

Ku iya, taja pia, sida sigi nitihka sebarang pemutus presiden enggau raban ketuai BN dalam nentuka sapa bagi chalun bediri ba penuduk DUN Pelagus ila.

“Taja pia, kami sigi bebasaka pemutus digaga parti, Masing enggau Kepala Menteri Datuk Patinggi Tan Sri Adenan Satem ba pengawa milih chalun Pelagus ila.

“Jaku tu semina mantaika juluk ati kami ke nyadi pengundi di DUN Pelagus. Nadai salah laban semua pekara ke disebut aku tu gempung ari peminta rayat. “Parti mega patut milih chalun ti ditaga ulih menang bepelasarka peminta rayat sereta penampak rita chalun nya empu.

“Kelimpah ari nya, rayat mega patut diberi peluang milih sapa bagi chalun ti dikedeka sida laban iya ke ngundi nya ila rayat,” pia ku iya.

Rambau PRN dulu suba, penuduk DUN Pelagus besatup tiga antara Stanley Nyitar dri tiket PRS-BN, George Lagong (Bibas) enggau Edward Sumbang Asun ari Parti Keadilan Rakyat (PKR).

Stanley teulihka 2,903 undi lalu George nerima 5,740 undi sereta Edward bulih 1,171 undi.

George ari Bebas menang ba penuduk DUN Pelagus enggau majoriti 2,837 undi.