Bernard Idit madah diri ngining deka bediri di DUN Bukit Semuja
MIRI: Seiku peranak asal bansa Bidayuh ke diau mendam di Miri madahka diri ngining penuduk sitak baru Kunsil Nengeri (DUN) Bukit Semuja ungkup Pengawa Bepilih Kunsil Nengeri (PRN) ke enda lama agi.
Kapten Bernard Idit, 46, ari Kampung Ampungan, Serian ke mega nyadi kaban Parti Pesaka Bumiputera Bersatu (PBB) Miri mantaika juluk ati iya maya berandau enggau Utusan Borneo ditu kemari.
Kenu ku iya, chalun iya ke dipilih ungkup penuduk nya ila patut bisi penau ngereja pengawa begulai enggau orang bukai ke bebida bansa, jalai pengarapa sereta ulih mutarka penanggul ke bisi nyadi di kandang menua nya.
“Chalun nya mega patut nyikap diri sereta ulih ngereja pengawa begulai enggau pengari bagi menua Serian ke bukai dikena nentuka Serian teulihka status mengeri besai jemah ila,” ku iya.
Ku Bernard nerang, enti sema iya diberi awak bejalaika pengawa nya, sekeda ari pemerat iya deka bebendar ngadaka pengawa puang ungkup raban nembiak di kandang menua nya nyengkaum meri pengerembai ekonomi nengah pengawa beranakka puku.
“Aku mega bisi juluk deka ngemansangka perengka guna ditu laban agi bisi sekeda menua di Serian apin ngembuan perengka guna baka bekal kuasa karan, bekal ai beresi sereta jalai alun ke manah,” ku iya.
Bernard diatu benung gawa nyadi Menijar Pengerai enggau Pengelikun Rampa Menua (HSE) di sebengkah kompeni kapal ke lalu nyadi Kaban Kaunsil Direktor Miri Port Authority (MPA).
Iya mega nyadi Chairman Serakup Dayak Bidayuh Nasional (DBNA) Miri sereta Kaban Komiti Kaunsil Tertinggi DBNA Sarawak.
Kelimpah ari nya, iya mega madahka diri deka chakah bejalaika pengawa rama enggau ungkup raban komuniti, sereta nyereta bemacham program begulai enggau raban serakup sereta gempung ukai dikuasa perintah (NGO) di menua tu.
Bukit Semuja bisi 13,192 pengundi ke udah berejista ari enam bengkah sitak ngundi nyengkaum lima ke sebedau tu dibaruh Kedup iya nya Triboh, Selabi, Pasar Serian, Kakai enggau Serian Ulu sereta sitak ngundi dibaruh Tebedu sebedau tu iya nya Sedihan.