Sebuah ‘Pasukan Khas’ deka mutar kes timbak mati di Sibu

KUCHING: Sebuah ‘Pasukan Khas’ ditumbuhka ari Indu Opis Polis Kontijen Sarawak (IPK) kena nasat kes timbak mati seiku orang dagang di Sibu, kena nyidi saspek.

Pekara nya kemari dipadahka Kepala Polis Sarawak Dato Sri Muhammad Sabtu Osman ke madahka sebuah ‘pasukan khas’ nya ari raban Pampang Kongsi Gelap, Perjudian dan Maksiat (D7), Bahagian Siasatan Khas (D9) enggau Opis Nasat Pengawa Salah Narkortik.

“Kami udah numbuhka sebuah ‘pasukan khas’ kena nasat kes di Sibu nya, ngambika pengawa nasat nya ulih digaga enggau jampat taja pan kes nya bisi bekait enggau pengawa dagang lalu aku empu udah ngasuh sida ari IPK Sarawak, iya nya ari raban D7, D9 enggau Nakortik ngiga saspek nya.

“Aku mega udah madahka lima iku orang udah ditangkap dalam kes tu, ngarapka kitai ulih mutarka kes tu,” ku iya.

Iya madah munyi mya lebuh dikerandau pemberita pengudah nguluka pengawa Gempuru Ninting Bulan Opis Pesuruhjaya Polis Kontijen Sarawak di Padang Kawad IPK Sarawak ditu, kemari.

Enti nitih, Sabtu madah kes tu bisi bekait enggau enda lantang ati tauka ‘dendam’ dalam pengawa dagang lalu ngenadaika pengawa ‘gangsterism’.

“Kes tu bekait enggau ‘ dendam’ ke bekait enggau pengawa dagang, nadai pengawa ‘gangsterism’, enti bisi ‘gangterism’, kami deka ngena POKA (Akta Pencegahan Jenayah Pindaan 2013) ba sida ke salah tu.

“Kami ngarap enggau perambu ke silik tu, kami deka nangkap saspek bukai ke bisi enggau ngereja pengawa salah tu,” ku iya.

Iya nandu baru, pengawa nasat kes tu benung bejalai bekait enggau senjata ti dikena lalu nyangka bisi senapang ti digaga kediri dikena nimbak orang nya.

Berindik enggau pekara tu, iya ngelalau sida ke bisi senjata api ti digaga kediri empu ke bedau direjista nyerah senjata api nya ngagai polis eng- gau jampat, ngambika enda disalah kena kelebih agi ba pengawa salah.

“Aku ngarapka orang mayuh ke bisi nyimpan tauka ngena senapang ti digaga kediri empu, nyerahka senapang nya ngagai polis laban iya salah baruh Akta Senjata Api.

“Enti ditangkap senjata api nya deka dirampas lalu orang nya tau kena ukum nengah genteran tusun ukum nya,” ku iya.

Hari Enam tu tadi, seiku orang ke ngempu sebuah palan pemerindang, Ting Meng Min, 30, parai lalu pangan indu iya, Xiao Fen bakal dalam sebengkah insiden timbak di sebuah kedai kopi di Jalai Long Bridge, Jalai Lanang Sibu