PWRI ngarapka ulih bekunsi enggau See Hua
Berita ari kededua menua Indonesia enggau Sarawak patut ulih nguntungka kededua komuniti, ku Abdullah
KUCHING: Seraban pemberita ari Kalimantan Barat (KALBAR) ngarapka mayuh agi kerejasama ulih diatur begulai enggau Raban See Hua, ke ngempu kompeni surat kabar ke pemadu besai di Sarawak, iya nya The Borneo Post, Utusan Borneo enggau See Hua.
Ketuai Serakup Pemberita Republik Indonesia pampang Sanggau, KALBAR Abdullah Hamid madah, raban pemberita Indonesia ngarapka bisi kerejasama antara kededua piak ngambika komuniti ari kededua buah menua tu ngelala sereta nemu pasal utai ke nyadi ba kededua menua.
“Aku ngarapka bisi kerejasama ke manah laban peransang ke manah ari kededua piak serakup, ngambika kami komuniti Indonesia ulih ngelala menua tu (Sarawak, Malaysia) nengah media ti ditabur Raban See Hua.
“Baka nya mega enggau komuniti Malaysia sama ngelala Indonesia nengah media kami tauka nengah Serakup Pemberita Republik Indonesia (PWRI),” ku iya.
Abdullah madah munyi nya lebuh dirandau pengudah nguluka 6 iku raban pemberita ari PWRI Kalimantan Barat bekelala enggau pemesai sereta pemberita ari Raban See Hua di opis surat kabar nya di Jalai Pending ditu, kemari.
Abdullah mega ngarapka pengulih surat kabar See Hua ngemasukka berita ari menua tu ngagai surat kabar nengah ‘online’ menua Indonesia, iya ti digaga PWRI.
Kelimpah ari nya, iya madah kaul ke terit antara media kededua piak menua deka mai mayuh agi pemansang ngagai kededua buah menua kelebih agi ari sepiak perintah ke ngembuan kaul ke terit ari suba.
“Ngembuan kaul ke terit antara kededua piak media ngaga komuniti media tu antara komuniti ngagai Perintah, sereta Perintah ngagai komuniti.
“PWRI ngarap bisi kerejasama ke menuku entara pemberita ari kededua piak, ukai semina sekali tu aja tang mega datai ke jemah ila,” ku iya.
Sebedau nya, Mandal Kon- sul Opis Konsulat Republik Indonesia pampang Kuching, Sarawak (pampang Pengawa Rama enggau pekara bekait enggau Adat Pesaka) Marisa Febriana Wardani madah PWRI ngarapka kerejasama enggau Raban See Hua, sebuah gerempung surat berita ke pengabis besai di Sarawak tu deka terus ngembuan kaul ke terit enggau raban pemberita Indonesia.
“Tuju pejalai raban pemberita ari Sanggau, KALBAR tu deka muka sereta betemu enggau raban pemberita ari menua tu (Sarawak) ngambika bisi kerejasama ti ulih digaga antara media kededua buah menua, Malaysia enggau Indonesia.
“Dalam pekara kerejasama bansa tu, kami ngarika Perintah Republik Indonesia, barang komunikesyen tauka kerejasama antara media, enti sema ari sepiak Indonesia deka ngaga kerejasama enggau Raban See Hua, iya patut digaga nengah opis konsulat,” ku iya, lalu nandu baru ngarapka mayuh agi kerejasama ulih digaga enggau Raban See Hua jemah ila.
Sama bisi ngulu atur pengawa nya kemari, Menijar Besai Operasyen (GOM) The Borneo Post, Phyllis Wong enggau Senior Managing Editor the Borneo Post, Francis Chan.
“
PWRI ngarap bisi kerejasama ke menuku entara pemberita ari kededua piak, ukai semina sekali tu aja tang mega
” datai ke jemah ila. Abdullah Hamid Ketuai Serakup Pemberita Republik Indonesia pampang Sanggau KALBAR