Bup serebareti Jaku Kejaman deka dichelak enda lama agi
SIBU: Raban bansa Kejaman di Pelilih Belaga mujur ngeluarka bup serebareti begambar keterubah jaku Kejaman-Malaysia- English.
Bup nya udah dipenyadika Menteri Muda Main Asal enggau Adat Lama, Liwan Lagang, kena 30 Disember, pengujung taun nyin tadi lalu berebak enggau nya mega pengawa nya nempa rikod ba Malaysia Book of Records ke alai pemadu mayuh mensia nyereta Tanda Suwey ke diatur di Rumah Panjai Kejaman Neh di Long Liten, Belaga.
Nitih penulis bup tusun jaku tu, Jacquelyne Ekot, besaup enggau seiku lecturer ari Universiti Malaysia Sarawak (UNIMAS), Amee Joan.
Jacquelyne, peranak asal Long Liten, mega gawa nyadi lecturer di Politeknik Kota Kinabalu, Sabah.
Tuju ke bendar ngeluarka bup serebareti nya dikena ngemeran sereta nyaga jaku bansa Kejaman.
“Nadai mayuh agi bansa Kejaman ngemeran sereta nemu jaku asal bansa diri ketegal mayuh ari sida belaki tauka bebini jadi enggau bansa bukai,” ku iya dalam surat berita ke diemail iya.
Bup tusun leka jaku Volume 1 penebal 57 lambar bisi ngundan 260 leka jaku bansa Kejaman ke udah dipilih lalu dibagi ngagai 10 sub-rintai nyengkaum perengka batang tubuh, rumah, pengawa betanam betupi, bansa jelu, utai tanam, buah, perengka muzik sereta mega kereban kain ke ditenun.
“Naka ke diatu, bup tusun leka jaku nya enda dijual laban agi nganti lumur siri International Standard Book Number (ISBN) ari Penerbitan UNIMAS,” ku iya.
Ku iya nambah, chelak keterubah tu bisi 10 set udah.
Bekenangka bup nya, Jacquelyne madah, ‘nau dengah nyeu d’lau nei’ dalam jaku Kejaman mai reti ‘nama berita nuan sehari tu’.
Bup tusun jaku Volume 2 deka dikeluar enda lama agi enti semua pengawa ngeluarka iya mujur,” ku iya.
Jacquelyne madah, kesemua penyampau 520 iku pesereta udah nyereta pengerami ke diatur Serakup Kejaman Sarawak.
“Raban pesereta nyengkaum sida ke lelaki, indu enggau nembiak mit ari Rumah Panjai Kejaman Neh enggau Kejaman Lasah.
“Tanda sida disempulang enggau tebah sape ari peranak Rumah Panjai Kejaman Neh,” ku iya.
Raban bansa Kejaman tu semina bisi ditemu diau di Sarawak lalu sida tu sebengkah ari raban bansa pemadu mit di nengeri tu.
Sida diau mendam di Rumah Panjai Kejaman iya nya Kejaman Neh di Long Liten sereta Kejaman Ba’Segaham, di Pelilih Belaga.