Adenan: Pinta ngenikika bayar royalti tejanggal ketegal rega minyak nurun
KUCHING: Pinta nengeri tu, ngenikika bayar royalti minyak ari 5 ngagai 20 peratus ari Perintah Besai bisi tejanggal ketegal rega minyak ti majak nurun, ku Kepala Menteri Datuk Patinggi Tan Sri Adenan Satem.
Ku iya, dalam timpuh setaun aja rega minyak nya udah nurun ngagai USD35 setung diatu.
“Gaya rega minyak ba makit dunya diatu enda berapa manah lalu nyadika kebuah pinta kitai nikika bayar royalti bisi lubah.
“Setaun ke udah, rega minyak USD150 setung tang diatu rega udah manggai USD35 setung.
Iya mansutka jaku tu rambau nyadi saksi pengawa nyain Kunterik entara Talisman Malaysia Limited (Repsol) enggau OceanMight Sdn Bhd ditu, kemari.
Kededua kompeni ngadu sempekat kerejasama ba pengawa ti bekait enggau industri minyak di Kinabalu, tunga ke barat tasik Sabah.
Ngenang sentang kerejasama nya, Adenan meri puji ngagai OceanMight Sdn Bhd ke nyadi anak kompeni KKB Engineering Berhad, seiti kompeni ari nengeri ti udah berengkah mungkal dagang ba industri minyak enggau gis.
“Baka ke suah disebut aku ngelama tu, kitai enggai agi semina ngemata kompeni bukai ngereja minyak dalam kandang endur tasik Sarawak.
“Enti minyak nya ditemu di Sarawak baikka nya di Bintulu, Miri tauka di Mukah… kitai, kompeni ari nengeri tu patut ngambi bagi sereta patut dulu dikemerat,”ku iya.
Aku suah madah diak kompeni ari Sarawak patut megai tanggungpengawa besai ba industri minyak enti minyak nya ba kandang endur nengeri tu, tandu iya.
Adenan nambah pengerambai industri minyak enggau gis chukup berat ungkup Sarawak ketegal nengeri tu mengkang jauh tinggal ari Semenanjung Malaysia.
Ku iya Semenanjung Malaysia disadang nyapai ikas menua mansang manggai taun 2020 tang Sarawak semina ulih manggai ba tikas nya ba taun 2030 iya nya 10 taun tinggal.
Bela datai Sekretari Perintah Nengeri Tan Sri Datuk Amar Mohd Morshidi Abdul Ghani, Menteri Infrastruktur enggau Penyambung Dato Sri Michael Manyin, Chairman KKB Engineering Berhad Dato Kho Kak Beng enggau Direktor Repsol (Asia & Russia) Ferdinando Rigardo.