UPP Dudong ngungkupka RM260,000 kena ngemujurka projek ba sitak nya

SIBU: Parti Rakyat Bersatu ( UPP) pampang Dudong udah ngaduka 11 bengkah projek ke beungkus urung RM260,000 dikena ngaga projek ungkup rumah panjai di Kunsil Nengeri (DUN) Dudong.

Chairman UPP Dudong Datuk Tiong Thai King madah, ari semua penyampau projek nya, empat bengkah projek aja bekenaka ungkus RM115,000.

“Ba Rumah Anthony Mering, Batu 16, Jalai Sibu-Bintulu, projek nangkir sereta ngemanah jelatung bekenaka ungkus RM10,000.

“Tu ditangkan projek ngaga parit ba Rumah Jabu Selat, Ulu Salim (RM40,000), projek ngemanah jalai Rumah Gagat Umar, Ulu Salim ( RM30,000) enggau projek ngemanah jalai Rumah Philip Radin, Nanga Salim ( RM35,000),” pia ku iya madah.

Iya mantaika pekara tu ngagai pengarang berita datai maya ngabas empat bengkah projek nya, kemari.

Penatai iya disempulang Chairman UPP Dudong Unit Bumiputera Bansa Sandah enggau bala bukai.

Kelimpah ti datai ngabas penembu projek nya, Tiong mega ngena awak tu berandau enggau rayat ba DUN nya.

Tebal agi peranak rumah panjai mantaika sebana sida bekaul enggau penusah ke ditapi baka penanggul ba pemanah jalai, karan ke enda likun agi sereta macham bengkah penanggul ke bukai.

“Kami pechaya Tiong ulih mutarka penanggul ke nuntung kami ngelama tu lalu andal iya ulih nyadi pengari kami ditu udah tembu Pengawa Bepilih Nengeri (PRN) ti deka datai,” pia ku iya peranak Rumah Philip Radin ti enggai dikelala nama.

GAGA ATI: TR Jabu (empat kanan) berasai gaga nerima penatai Tiong (tiga kanan) enggau bala bukai ti ngabas penembu projek parit rumah panjai baru iya di Ulu Salim ditu.

TERIMA KASIH: TR Anthony (tiga kanan) beterima kasih ngagai Tiong (tiga kiba) ketegal ke udah meri projek ngemanah sereta nangkir baru jelatung sida. Bela bisi ayan Bansa (kanan).

MENDING SEBANA: Tiong ngambi awak nya mendingka sebana peranak Rumah Philip.